„მე პირდაპირ გეტყვით, არაფორმალური მმართველი ბიძინა ივანიშვილი მართავს უშიშროების სტრუქტურებს, კონკრეტულად მოადგილეზე არის პირდაპირ გასული, პირდაპირ იღებს დავალებებს ის ადამიანი,“ - აღნიშნული განცხადება „თავისუფალი დემოკრატების“ თავმჯდომარემ ირაკლი ალასანიამ „რუსთავი2“ -ზე ბათუმიდან პირდაპირ ეთერში ჩართვისას გააკეთა და ხაზი გაუსვა, რომ აქედან გამომდინარე ფარული ჩანაწერის გავრცელების ფაქტზე გამოძიებამ ამ მიმართულებითაც უნდა იმუშაოს.

„პრემიერ მინისტრი როდესაც დაინიშნა თავის თანამდებობაზე, ჩვენ კარგად ვნახეთ, რომ პრაქტიკულად ვერც ერთი ცვლილება ვერ განახორციელა ხელისუფლებაში, იმიტომ რომ არაფორმალურ მმართველს არ უნდოდა, რომ ეს ცვლილებები განხორცილებულიყო. მე პირდაპირ გეტყვით, არაფორმალური მმართველი ბიძინა ივანიშვილია. ის მართავს უშიშროების სტრუქტურებს, კონკრეტულად მოადგილეზე არის პირდაპირ გასული, პირდაპირ იღებს დავალებებს ის ადამიანი, აქედან გამომდინარე, აბსოლუტურად საფუძვლიანია, რომ ეს ვერსიაც განიხილებოდეს სამართალდამცავი სტრუქტურის მხრიდან და პრემიერ მინისტრის მიერ დავალებული გამოძიება აქეთკენაც უნდა მუშაობდეს. ხაზს ვუსვამ, ლოგიკურად ხელისუფლებას აქვს მხოლოდ და მხოლოდ შეღწევა ასეთ მასალასთან, ეს მასალა არ იყო განადგურებული, ეს მასალა დევს სპეცსამსახურებში. ასევე შეიძლება ეს ყოფილიყოს ძველი ხელისუფლების მიერ ტირაჟირებული, მაგრამ მე დღეს აბსოლუტურად მგონია შინაგანად, რომ იმ მოვლენების განვითარებით, როგორც ხდებოდა ბოლო წლების განმავლობაში და ბოლო, განსაკუთრებით ერთი წლის განმავლობაში, მანიპულირება პირადი ცხოვრებით, როგორ ხდებოდა ჩარევა სხვადასხვა მედიის, თუ საკონსტიტუციო სასამართლოს თუ ნებისმიერი სხვა მოქალაქეების წინააღმდეგ, ეს მაძლევს მე გარკვეულ საფუძველს, ვივარაუდო, რომ სწორედ ხელისუფლების გარკვეული შტოდან მოდის ეს ამორალური და ცინიკური თავდასხმა,“ განაცხადა ირაკლი ალასანიამ.