პირადი ცხოვრების ამსახველი მორიგი ფარული ვიდეო მასალის ინტერნეტით გავრცელებასთან დაკავშირებით, მთავარ პროკურატურაში ჟურნალისტის, ლაშა ბერულავას დაკითხვა მიმდინარეობს. ბერულავას თქმით, საქმე ეხება ფარულ ვიდეოჩანაწერს, რომელიც დღეს დილით, დაახლოებით 07:30 საათზე მან Facebook -ის საუთარ გვერდზე აღმოაჩინა, რის შემდეგაც მან გააკეთა ე.წ. "სქრინშოტი", ასევე შეინახა იმ გვერდის სახელწოდება, რომლითაც აღნიშნული ვიდეო მის გვერდზე დაიპოსტა. მან სწორედ აღნიშნული მასალები მიიტანა მთავარ პროკურატურაში.


"დილით, როცა ვიდეო ვნახე, "დავსქრინე", წავშალე და დავრეკე საპატრულო პოლიციაში. ისინი ოპერატიულად მოვიდნენ. მივაწოდე ინფორმაცია, შემდეგ ასევე გამომძიებლები მოვიდნენ, გამომკითხეს და ამის შემდეგ დამიბარეს პროკურატურაში,"  განაცხადა ლაშა ბერულავამ, რომელმაც დილას აღნიშნული განცხადება გაავრცელა:


"ძალიან გვიან გამოვრთე კომპიუტერი, დაახლოებით დილის 05:00 იქნებოდა. გასვლის წინ კედელს ვამოწმებ ხოლმე - ხომ არ დაუსვამს რაიმე შეკითხვა ვინმეს, სპამი ხომ არ არის და ა.შ. ასევე ვიქცევი დილით, როცა ლეპტოპს ვრთავ. გამორთვის დროს მსგავსი არაფერი ყოფილა, ხოლო დილით, როცა დაახლოებით 08:15-ზე "ფეისბუქზე" შევედი და კედელს ჩავუყევი, აღმოვაჩინე, რომ ყველაზე გვიან დადებულ ჩემს სტატუსზე, რომელიც ანკარაში ტერაქტს ეხებოდა, უცნაური ლინკი იყო მოწოდებით: "გაავრცელეთ!"


ფეისბუქის ქრონოლიგია მიჩვენებდა, რომ ერთი საათის წინ იყო დადებული. სქრინები გადავიღე და ცხადია, ლინკი წავშალე, თუმცა, მანამდე ვნახე, რა იყო".