ჩრდილოეთ კორეამ ზღვაში ბალისტიკური რაკეტა გაუშვა. ინფორმაციას ამის შესახებ BBC სამხრეთ კორეისა და შეერთებული შტატების ოფიციალურ პირებზე დაყრდნობით ავრცელებს.


მათი განცხადებით, რაკეტა აღმოსავლეთ სანაპიროზე გაუშვეს და ის დაახლოებით 800 კილომეტრის დაცილებით წყალში ჩაეშვა. ჩრდილოეთ კორეას ამის შესახებ კომენტარი არ გაუეთებია. მოგვიანებით შეერთებული შტატების თავდაცვის წარმომადგენელმა კი განაცხადა, რომ ფხენიანმა მეორე რაკეტაც გაუშვა.


ჩრდილოეთ კორეის ლიდერმა კიმ ჩენ ინმა ბირთვული იარაღის სრულ მზადყოფნაში მოყვანის ბრძანება მარტის დასაწყისში გასცა. როგორც BBC  იუწყება, მან ასევე მოითხოვა სამხედრო დოქტრინის გადახედვა, რათა ქვეყანას ჰქონდეს საშუალება, საჭიროების შემთხვევაში პრევენციული დარტყმა განახორციელოს.


"მზად უნდა ვიყოთ, რომ ბირთვული ქობინები ნებისმიერ დროს გამოვიყენოთ", - განაცხადა კიმ ჩენ ინმა.


საპასუხოდ, აშშ-მ მოუწოდა ჩრდილოეთ კორეას, თავი შეიკავოს პროვოკაციული ქმედებებისგან, რომელიც რეგიონის ესკალაციას იწვევს.


ამერიკასა და ჩრდილოეთ კორეას შორის გაუარესებული ურთიერთობები კიდევ უფრო მას შემდეგ გამწვავდა, რაც ფხენიანმა ამერიკელი სტუდენტი გაასამართლა.


შეერთებული შტატები დაჟინებით მოუწოდებს ჩრდილოეთ კორეას დაუყოვნებლივ გაათავისუფლოს ამერიკელი სტუდენტი, რომელსაც სახელმწიფოს წინააღმდეგ ჩადენილი დანაშაულისთვის 15 წლით პატიმრობა მიესაჯა და მკაცრი  რეჟიმის შრომა-გასწორების კოლონიაში სასჯელის მოხდა მოუწევს.


21 წლის ოტო უორმბაიერი ჩრდილო კორეაში იანვარში ვიზიტისას სასტუმროდან პროპაგანდის ნიშნის მოპარვის მცდელობისთვის დააპატიმრეს.


თეთრი სახლის წარმომადგენელმა ჩრდილო კორეა შეერთებული შტატების მოქალაქეების "მათი პოლიტიკური დღის წესრიგის მიზნის მიღწევაში მძევლებად" გამოყენებაში დაადანაშაულა.


"ჩვენ მტკიცედ მოვუწოდებთ ჩრდილოეთ კორეის მთავრობას, ბოდიში მოუხადოს მას, გამოსცეს სპეციალური ამნისტია და დაუყოვნებლივ გაათავისუფლოს ის," განაცხადა თეთრი სახლის წარმომადგენელმა ჯოშ ერნესტმა.


ზოგადად კი, ბოლო პერიოდის განმავლობაში ჩრდილოეთ კორეის მიერ გადადგმული ნაბიჯები შეერთებული შტატების  და გაეროს განსაკუთრებული კრიტიკის საგანია. ამერიკას მეტისმეტად აშფოთებს ფხენიანის მზარდი სწრაფვა მძლავრი ბირთვული სახელმწიფოს ჩამოყალიბებისაკენ.


2006 წლიდან ფხენიანმა 4 ბირთვული გამოცდა ჩაატარა, რის გამოც თებერვლის ბოლოს  გაერო-ს უშიშროების საბჭომ  ჩრდილოეთ კორეის წინააღმდეგ უმკაცრესი სანქციების პაკეტი ერთსულოვნად დაამტკიცა.


ახალი სანქციების შესაბამისად, ყველა გემი, რომელიც ჩრდილოეთ კორეაში შედის, თუ იქიდან გამოდის, შემოწმდება. ამავე სანქციების თანახმად, 16 პირი და 12 ორგანიზაცია შავ სიაში შეიყვანეს.


გემების სავალდებულო შემოწმების გარდა, სანქციები ასევე მოიცავს ირაღის გაყიდვისა და ჩრდოლოეთ კორეაში მსუბუქი შეიარაღების გადატანის აკრძალვას და ქვეყნიდან იმ დიპლომატების გაძევებას, რომელნიც ჩართულნი არიან "არაკანონიერ აქტივობებში".


შეერთებული შტატები და ჩრდილოეთ კორეის დიდი ხნის მოკავშირე ჩინეთი, ახალ სანქციებს 7 კვირა განიხილავდნენ.


შეერთებული შტატების პრეზიდენტმა ბარაქ ობამამ განაცხადა, რომ საერთაშორისო საზოგადოება "ერთი ხმით" საუბრობდა, რომ ეთქვა ჩრდილოეთ კორეისთვის, რომ მან, "უნდა მიატოვოს ეს სახიფათო პროგრამები და აირჩიოს უკეთესი გზა თავისი ხალხისათვის".


ჩრდილოეთ კორეა დაჟინებით ამტკიცებს, რომ მისი სარაკეტო პროგრამა წმინდა წყლის სამეცნიერო ხასიათისაა, მაგრამ, შეერთებული შტატები, სამხრეთ კორეა და თვით ფხენიანის მოკავშირე ჩინეთიც კი ამბობენ, რომ მსგავსი რამ, რაც მაგალითად ჩრდილო კორეამ გააეთა, როცა იანვარში ორბიტაზე სატელიტი გაუშვა, მიზნად ისახავს ინტერკონტინენტალური ბალისტიკური რაკეტების განვითარებას.