„პარტია "მემარცხენე ალიანსის" მოთხოვნა საქართველოს ხელისუფლებამ სრულად დააკმაყოფილა და უმოკლეს დროში შესაძლებელი იქნება დღემდე დაურეგისტრირებელი მიწების უფასოდ დარეგისტრირება, - ამის შესახებ პარტიის პოლიტიკურმა მდივანმა პაატა ჯიბლაძემ დღეს გამართულ ბრიფინგზე განაცხადა.


„პარტია „მემარცხენე ალიანსის“ მოთხოვნა, რომელიც შეეხებოდა კერძო საკუთრებაში არსებული დაურეგისტრირებელი მიწების უფასოდ დარეგისტრირებას, ხელისუფლების მიერ დაკმაყოფილებულ იქნა, რასაც გულითა და სულით  ვულოცავთ სრულიად საქართველოს მოსახლეობასა და განსაკუთრებით სოფლად მცხოვრებ ჩვენს იმ თანამოქალაქეებს, რომელთაც მრავალი წლის მანძილზე, ძვირადღირებული სერვისის გამო ფაქტიურ მფლობელობაში მქონე მიწა დაუკანონებელი ჰქონდათ, რაც მისი დაკარგვის მაღალი რისკის შემცველი იყო. აღნიშნული პრობლემის მოწესრიგების მიზნით პარტია „მემარცხენე ალიანსმა“  ხელისუფლებას მოუწოდა სრულად დაეფინანსებინა მიწის რეგისტრაციისთვის გასაღები ყველა ხარჯი.


გუშინ, ქვეყნის იუსტიციის მინისტრმა, ქალბატონმა თეა წულუკიანმა გააკეთა საგანგებო განცხადება, „მემარცხენე ალიანსის“  მიერ დასმული საკითხის სრულად დაკმაყოფილების თაობაზე.

მინისტრის განცხადებით უახლოეს მომოვალში საჯარო რეესტრი მოიპოვებს უფლებამოსილებას მთლიანად მოაწესრიგოს მიწის რეგისტრაციისათვის აუცილებელი დოკუმენტაცია, ცხადდება ხარვეზიანი დოკუმენტების ლეგალიზაცია, ასევე მოქალაქეებისათვის დოკუმენტაციის მოძიება-სისტემატიზაცია და მიწის ნაკვეთების საკუთრებაში ძვირადღირებული აღიარება გახდება უფასო“ - განაცხადა პაატა ჯიბლაძემ.