პარტია „მემარცხენე ალიანსის“ მიერ წარდგენილი საკანონმდებლო წინადადების „მეშახტეთა სოლიდარობის კანონის“ განხილვა დღეს საქართველოს პარლამენტის ჯანმრთელობის დაცვისა და სოციალურ საკითხთა კომიტეტში გაიმართა.


აღნიშნული წინადადება ეხება საქართველოს შრომის კოდექსში ცვლილებებს, ამის თაობაზე მომხსენებლები იყვნენ „მემარცხენე ალიანსის“ თავმჯდომარე კახა ძაგანია და პარტიის იურიდიული დეპარტამენტის ხელმძღვანელი ელზა ჯმუხაძე.


„მემარცხენე ალიანსის“ პრეს-სამსახურის მიერ გავრცელებული ინფორმაციის თანახმად, სხდომაზე განიხილეს პარტიის მიერ წარდგენილი შემდეგი საკანონმდებლო წინადადებები:


1.    ,,საქართველოს შრომის კოდექსით,, აიკრძალოს ყოველგვარი შრომითი ურთიერთობა, რომელიც არ არის შეთანხმებული წერილობით, თუ სამუშაო მოიცავს ,,საქართველოს შრომის კოდექსით,, დადგენილ 1 (ერთ) სამუშაო კვირაზე მეტ დროს;


2.    საქართველოს შრომის კოდექსით განისაზღვროს ყოველგვარი (მათ შორის ზეგანაკვეთური) შრომის საათობრივი ანაზღაურების ფიქსირებული, სავალდებულოდ მინიმალური ოდენობა;


3.    საქართველოს შრომის კოდექსით განისაზღვროს შრომის საათობრივი ანაზღაურებიდან გამომდინარე შრომის ანაზღაურების არა ყოველთვიურად, არამედ - ყოველკვირეულად დაანგარიშების და გადახდის წესი;


4.    ,,საქართველოს შრომის კოდექსით შრომის საათობრივი ანაზღაურების ფიქსირებული, სავალდებულოდ მინიმალური ზღვარი განისაზღვროს  საარსებო მინიმუმის ხუთმაგი ოდენობიდან;


5.    ,,საქართველოს შრომის კოდექსი,, ცნობდეს ტერმინებს ,,ინფლაცია,,  და ,,ინდექსაცია,,


6.    ,,საქართველოს შრომის კოდექსით,, განისაზღვროს დამსაქმებლის პასუხისმგებლობა და დასაქმებულის ინტერესების დაცვის გარანტიები იმ შემთხვევაში, თუ ინფლაცია ან/და სხვა შეცვლილი გარემოება არსებითად შეამცირებს ხელშეკრულებით გათვალისწინებული შრომის საათობრივი ანაზღაურების ოდენობას, რაც გააუარესებს დასაქმებულის მდგომარეობას.