ბელგიამ 3-დღიანი გლოვა გამოაცხადა მას შემდეგ რაც ქვეყნის დედაქალაქ ბრიუსელში მომხდარი ტერორისტული აქტების შედეგად 34 ადამიანი მოკვდა და დაახლოებით 250 დაიჭრა.


11:00 სთ-ზე (GMT) წუთიერი დუმილით პატივს მიაგებენ აფეთქებებისას დაღუპულთა ხსოვნას.


ბელგიის პოლიციამ, ბრიუსელის მთავარ აეროპორტსა და მეტრო სადგურზე განხორციელებული თავდასხმების შემდეგ ძებნის ოპერაცია გამოაცხადა.


მამაკაცი, რომელიც CCTV -მ დააფიქსირა, ორ სხვა ეჭვმიტანილთან ერთად, რომლებიც სავარაუდოდ თვითმკვლელი დეტონატორების ამოქმედებისას, აფეთქებების დროს დაიღუპნენ, აეროპორტში ურიკას მიაგორებს.


ბრიუსელში განხორციელებულ ტერაქტებზე პასუხისმგებლობა "ისლამურმა სახელმწიფომ" აიღო. როგორც BBC იუწყება, ამის შესახებ განცხადება ტერორისტული დაჯგუფების ერთ-ერთმა მედიასაშუალებამ, სააგენტო "ალ-ამაკმა"გაავრცელა.


განცხადებაში ნათქვამია, რომ "ისლამური სახელმწიფოს" მებრძოლებმა თავდასხმები შაჰიდის ქამრებისა და ასაფეთქებელი მოწყობილობების საშუალებით განახორციელეს.


"ისინი თავს დაესხნენ აეროპორტსა და მეტროს ცენტრალურ სადგურს ბელგიის დედაქალაქ ბრიუსელის ცენტრში, ქვეყანაში, რომელიც "ისლამური სახელმწიფოს" წინააღმდეგ საერთაშორისო კოალიციაში მონაწილეობს", - ნათქვამია განცხადებაში.


ტერორისტების თქმით, "მებრძოლებმა" ზავენტემის აეროპორტში ცეცხლი გახსნეს, რის შემდეგაც რამდენიმე მათგანმა თავი აიფეთქა. მაელბეკის სადგურზეც ასევე თვითმკვლელმა ტერორისტმა აიფეთქა თავი.