"პაატა ბურჭულაძე - საქართველოს განვითარების ფონდმა" სახელმწიფო აუდიტის სამსახურს განუმარტა, რომ ფონდს არანაირი საარჩევნო და პოლიტიკური მიზნები არ გააჩნია. ამის შესახებ ნათქვამია სახელმწიფო აუდიტის სამსახურის მიერ გავრცელებულ განცხადებაში, რომლის მიხედვითაც ფონდმა უარყო გავრცელებული მოსაზრებები 2016 წლის საპარლამენტო არჩევნებში მონაწილეობასთან დაკავშირებით.


სახელმწიფო აუდიტის სამსახური არასამთავრობო ორგანიზაცია "სამართლიანი არჩევნებისა და დემოკრატიის საერთაშორისო საზოგადოების" (ISFED) მიერ 2016 წლის 21 მარტს გამოქვეყნებული კვლევის შედეგებთან დაკავშირებით პოზიციას გამოხატავს და განმარტავს, რომ 2016 წლის 5 თებერვლის გენერალური აუდიტორის ბრძანების საფუძველზე, ლეონიდ ჩერნოვეცკის ფონდი "გაერთიანება ბედნიერი საქართველოსთვის" "მოქალაქეთა პოლიტიკური გაერთიანებების შესახებ" საქართველოს ორგანული კანონის საფუძველზე აღიარებულია გაცხადებული საარჩევნო მიზნის მქონე პირად და გავრცელდა პოლიტიკური პარტიებისთვის გათვალისწინებული შეზღუდვები.


"მას მიეცა მითითება საქველმოქმედო და პოლიტიკური მიზნების გამიჯვნასთან დაკავშირებით, რომლის შესრულების მიმდინარეობაც კონტროლდება სახელმწიფო აუდიტის სამსახურის წარმომადგენლების მიერ. ასევე მიმდინარეობს საქველმოქმედო ორგანიზაცია "სოციალური პარტნიორობის" საქმიანობის მონიტორინგიც და საარჩევნო კამპანიაში რაიმე ფორმით მონაწილეობის დაფიქსირების შემთხვევაში მოხდება კანონმდებლობით გათვალისწინებული რეაგირება", - აცხადებენ აუდიტის სამსახურში.


რაც შეეხება კვლევაში დაფიქსირებული მეორე სუბიექტის საქმიანობას, როგორც უწყებაში განმარტავენ, ამასთან დაკავშირებით სახელმწიფო აუდიტის სამსახურის მიერ 2016 წლის 1-ელ მარტს, არასამეწარმეო (არაკომერციული) იურიდიული პირის "პაატა ბურჭულაძე - საქართველოს განვითარების ფონდის" სახელზე გაიგზავნა წერილი, რომლითაც მოთხოვნილი იყო საქმიანობასთან და შესაძლო საარჩევნო მიზნებთან დაკავშირებული ინფორმაცია.


"აღნიშნული წერილის საპასუხოდ, 2016 წლის 14 მარტს "პაატა ბურჭულაძე - საქართველოს განვითარების ფონდმა" განმარტა, რომ ფონდს არ გააჩნია არანაირი საარჩევნო და პოლიტიკური მიზნები და უარყო გავრცელებული მოსაზრებები 2016 წლის საპარლამენტო არჩევნებში მონაწილეობასთან დაკავშირებით. აღნიშნულიდან გამომდინარე, სახელმწიფო აუდიტის სამსახურს ამ ეტაპზე არ გააჩნია ფორმალური საფუძველი "პაატა ბურჭულაძე - საქართველოს განვითარების ფონდი" დაექვემდებაროს პოლიტიკური პარტიებისთვის დადგენილ შეზღუდვებს, რადგანაც "მოქალაქეთა პოლიტიკური გაერთიანებების შესახებ" საქართველოს ორგანული კანონის 71 მუხლის შესაბამისად, "გაცხადებული საარჩევნო მიზანი ის ფაქტობრივი გარემოებაა, როდესაც იკვეთება კონკრეტული პირის არჩევნებში მონაწილეობის გზით ხელისუფლებაში მოსვლის სურვილი. განცხადება გაკეთებული უნდა იყოს საჯაროდ და მიმართული უნდა იყოს საზოგადოებრივი აზრის ჩამოყალიბებისკენ", - განმარტავენ სახელმწიფო აუდიტის სამსახურში.


სახელმწიფო აუდიტში აცხადებენ, რომ ზემოაღნიშნულის მიუხედავად, უწყება განაგრძობს ყველა მსგავსი სუბიექტის აქტივობის შესწავლას, ხოლო მონიტორინგის შედეგად გამოვლენილი საკითხებისა და აღმოჩენილი დარღვევების შესახებ ნებისმიერ დაინტერესებულ მხარეს დაუყოვნებლივ მიაწვდის ინფორმაციას.


"ჩვენ კიდევ ერთხელ მოვუწოდებთ ყველა სუბიექტს, ვისაც აქვს სურვილი მონაწილეობა მიიღოს 2016 წლის საპარლამენტო არჩევნებში, დაექვემდებაროს პოლიტიკური პარტიებისთვის კანონმდებლობით დადგენილ წესებს და დარეგისტრირდეს სახელმწიფო აუდიტის სამსახურში, რათა მივაღწიოთ პოლიტიკური ფინანსების მაქსიმალური გამჭვირვალობის სტანდარტს და სამართლიანი საარჩევნო გარემოს ფორმირებას", - აცხადებენ სახელმწიფო აუდიტის სამსახურში.