დღეს ქობულეთის მუნიციპალიტეტში საკრებულოს რიგგარეშე სხდომა გაიმართა. საკრებულოს წევრებმა კენჭი დღის წესრიგით გათვალისწინებულ 14 საკითხს უყარეს. სხდომაზე პირველ საკითხად დეპუტატებმა მუნიციპალიტეტის ბიუჯეტში შესატანი ცვლილებები განიხილეს.

როგორც guardian.ge -ს ქობულეთის მუნიციპალიტეტის გამგეობიდან აცნობეს, ბიუჯეტში განხოციელებული ცვლილების შესაბამისად 6 269 466 ლარის გადასახდელები დაიგეგმა. შემოსულობების ნაწილში ჯამში ბიუჯეტი 4 329 681 ლარით გაიზარდა, მათ შორის 2 754 503 ლარი გარდამავალ ნაშთს წარმოადგენს, ასევე მოხდა „სოფლის მხარდაჭერის პროგრამით“ გამოყოფილი თანხის დასახლებების მიხედვით გადანაწილება და დამტკიცება. სხდომაზე იმსჯელეს საზაფხულო სეზონთან დაკავშირებით ქ. ქობულეთის ტერიტორიის ზონებად დაყოფისა და მუნიციპალიტეტის საკუთრებაში არსებული არასასოფლო-სამეურნეო დანიშნულების მიწის ნაკვეთების საიჯარო ფასების განსაზღვრის შესახებ.

საკრებულოს სხდომაზე დღესვე შევიდა ცვლილებები „დიალეზის სახელმწიფო პროგრამაში ჩართული პაციენტების ტრანსპორტირების“, ცერებრალური დამბლით დაავადებულ ბავშვთა ფსიქოსომატური აბილიტაციის/რეაბილიტაციის პროგრამაში ჩართულ ბენეფიციართა ტრანსპორტირების“, „სოციალურად დაუცველი ფენისათვის უფასო სასადილოს“, „გულის ქირურგიის თანადაფინანსების“, „მეორე ტიპის დიაბეტით დაავადებულ პაციენტთა მედიკამენტოზური დახმარებისა“ და „სტიქიის შედეგად დაზარალებული ოჯახების დახმარების“ მიზნობრივ, ასევე სპორტული საკლუბო გუნდების პროგრამებში.