ვაშინგტონში, კაპიტოლიუმის ვიზიტორთა ცენტრში ფეხით მიმავალ მამაკაცს პოლიციამ ცეცხლი მას შემდეგ გაუხსნა, რაც მან პოლიციის ოფიცრების მისამართით იარაღის გამოყენება სცადა და რამდენიმე გასროლა მოახდინა.  


"როიტერსის" ინფორმაციით, დაჭრილია 66 წლის ტენესელი ლარი დოსონი, რომელიც საავადმყოფოშია გადაყვანილი. მისი ჯანმრთელობის მდგომარეობა სტაბილურია, მაგრამ კრიტიკული, ნათქვამია კაპიტოლიუმის პოლიციის მიერ გავრცელებულ განცხადებაში.


ერთ-ერთი ქალბატონი, რომელიც ამ ინციდენტის ახლოს იმყოფებოდა, ასევე დაჭრილია და ისიც საავადმყოფოშია გადაყვანილი. მისი ჯანმრთელობის მდგომარეობაზე ინფორმაცია არ გავრცელებულა.

კაპიტოლიუმის პოლიციის მეთაურმა მათიუ ვერდეროსამ განაცხადა, რომ დოსონს ბრალი მომაკვდინებელი იარაღით თავდასხმისა და პოლიციის ოფიცერზე შეიარაღებული თავდასხმისთვის წარედგინა.


ვერდეროსას თქმით, პოლიციის არც ერთი ოფიცერი არ დაშავებულა. მან თქვა, რომ უცნობია პოლიციის რამდენმა ოფიცერმა გახსნა ცეცხლი. ინციდენტის ადგილიდან ამოღებულია იარაღი, ეჭვმიტანილის ავტომანქანას კაპიტოლიუმის მიწისქვეშა სადგომზე მიაგნეს.

ინციდენტის გამო, შეერთებული შტატების საიდუმლო სამსახურმა ტურისტების გადაადგილება მიმდებარე ტერიტორიასა და თეთრ სახლთან დროებით შეზღუდა. ცოტა ხნით დაიხურა კონგრესიც, თუმცა ის მალევე გაიხსნა.

პოლიციამ დოსონი ოქტომბერში დააკავა მას შემდეგ, რაც მან კონგრესის სესიის მიმდინარეობა ყვირილით შეაფერხა. the Washington Post -ის ცნობით, იგი გაჰყვიროდა, რომ "ღმერთისგან მოვლენილი წინასწარმეტყველი" იყო. როგორც გაზეთი წერდა, მოსამართლის გადაწყვეტილებით, მას კაპიტოლიუმის მიმდებარე ტერიტორიისგან თავის შორს დაჭერა დაეკისრა.