ჩვენ ვართ დამაჯერებლად გამარჯვებული პოლიტიკური ძალა, - ამის შესახებ საქართველოს პრემიერ-მინისტრმა ირაკლი ღარიბაშვილმა "ქართული ოცნების" ოფისში გამართულ პრესკონფერენციაზე განაცხადა, სადაც პრემიერმა ადგილობრივი თვითმმართველობის არჩვენების შედეგები შეაჯამა.

მისივე თქმით, საქართველოს მასშტაბით, კოალიცია "ქართულმა ოცნებამ" მოიპოვა 67,6 %, თბილისში კი "ქართული ოცნების" პროცენტული მაჩვენებელი 74 %-ს შეადგენს.

"ვფიქრობ, ზოგიერთი ოპოზიციური ძალის მხრიდან, ამ შემთხვევაში, პირდაპირ შეიძლება ითქვას, "ნაციონალური მოძრაობის" მხრიდან, სრულიად შეგნებულად მიმდინარეობს დეზინფორმაციის გავრცელება და ხდება ციფრებით მანიპულირება. ხდება პირდაპირი მოტყუება ჩვენი მოსახლეობის, ყოველ შემთხვევაში ამის მცდელობა ჰქონდათ, მაგრამ მე მინდა ამ ადამიანებს შევახსენო, რომ დღეს რეალობა აბსოლუტურად განსხვავებულია საქართველოში. ჩვენ ვართ ერთადერთი პოლიტიკური ძალა, რომელსაც ქართველმა ხალხმა გამოუცხადა სრული ნდობა 2012 წლის საპარლამენტო არჩვენებზე და ჩვენ ვართ ის ძალა, რომელსაც ნდობა გამოუცხადა ადგილობრივ არჩევნებზე. ამიტომ, აღვნიშნავ, რომ საქართველოს მასშტაბით, კოალიცია "ქართულმა ოცნებამ" მოიპოვა 67,6 %, თბილისში "ქართული ოცნების" პროცენტული მაჩვენებელი შეადგენს – 74 %-ს . ეს არის უპრეცედენტო მაჩვენებელი, რომელიც არასოდეს დაფიქსირებულა და ეს მიანიშნებს იმაზე, რომ ჩვენ ვართ დამაჯერებლად გამარჯვებული პოლიტიკური ძალა. რა თქმა უნდა, ჩვენ არავის მივცემთ საშუალებას, მათ შორის, არც მედია საშუალებებს, რომ ტყუილის ტირაჟირება მოახდინონ და მოსახლეობა შეგნებულად შეიყვანონ შეცდომაში", - აღნიშნა პრემიერ-მინისტრმა.

მისივე თქმით, ადგილობრივი თვითმმართველობის არჩევნების შედეგად, ჩვენ გვეყოლება ნამდვილად მრავალპარტიული, 6 ოპოზიციური პარტიითა და "ქართული ოცნების" უმრავლესობით წარმოდგენილი საკრებულოები ყველა ოლქში.