შეერთებული შტატების სახელმწიფო დეპარტამენტმა ფედერალური საგამოძიებო ბიუროს (FBI)  თხოვნის საფუძველზე შეაჩერა შიდა განხილვის გეგმები იმასთან დაკავშირებით, თუ რამდენად სათანადოდ იყო ყოფილი სახელმწიფო მდივნის ჰილარი ქლინთონის იმეილი გამოყენებული კლასიფიცირებული ინფორმაციის გადასაცემად. ამის შესახებ სააგენტო „როიტერსი“ წერს.

ქლინთონმა, 2016 წლის 8 ნოემბრის საპრეზიდენტო არჩევნების ერთ-ერთმა წამყვანმა კანდიდატმა დემოკრატიული პარტიიდან, ბოდიში მოიხადა 2009-2013 წლებში სახელმწიფო მდივნის პოსტზე ყოფნისას მისი პირადი იმეილის სერვერის ოფიციალური საქმეებისთვის გამოყენების გამო და განაცხადა, რომ მას ამით არაფერი დაუშავებია.

29 იანვარს სახელმწიფო დეპარტამენტმა განაცხადა, რომ 22 იმეილს, რომელიც ქლინთონისგან გაიგზავნა ან მიღებულ იქნა, შეერთებული შტატების უსაფრთხოების სამსახურების თხოვნის საფუძველზე საიდუმლო იმეილების კლასიფიკაცია მიენიჭა და არ გასაჯაროვდება, განსხვავებით მისი ათასობით სხვა იმეილისაგან. სახელმწიფო დეპარტამენტის ცნობით, გაგზავნისას არც ერთი იმელი არ ყოფილა აღნიშნული, როგორც „კლასიფიცირებული“.

„ფედერალური საგამოძიებო ბიურო დაგვიკავშირდა და აგვიხსნა, რომ ჩვენ უნდა მივდიოთ ჩვენს სტანდარტულ საპროცესო ნორმებს, რაც იმაში გამოიხატება, რომ დროებით შევაჩეროთ ჩვენი შიდა განხილვა იმ დროის განმავლობაში, როცა კანონით გათვალისწინებული საგამოძიებო საქმიანობა მიმდინარეობს,“ განუცხადა სახელმწიფო დეპარტამენტის წარმომადგენელმა ელიზაბეტ ტრუდომ ჟურნალისტებს და დაამატა:

„ჩვენ ხელახლა შევაფასებთ შემდგომ ნაბიჯებს მას შემდეგ, რაც ფედერალური საგამოძიებო ბიუროს სამუშაო დასრულდება.“