ევროპულ და ევროატლანტიკურ სტრუქტურებში ინტეგრაციის საკითხებში საქართველოს სახელმწიფო მინისტრის დავით ბაქრაძის თქმით, ლოგიკურია ვივარაუდოთ, რომ ევროპარლამენტის იუსტიციისა და საშინაო საქმეთა კომიტეტი საქართველოსთვის ვიზალიბერალიზაციის საკითხს 7 აპრილს განიხილავს.


"როდესაც კომისიამ გადააგზავნა შესაბამისი საკანონმდებლო ინიციატივა ერთი მხრივ პარლამენტში, მეორე მხრივ, საბჭოში, დაიწყო შესაბამისი მოქმედებები. კერძოდ, იუსტიციისა და საშინაო საქმეთა კომიტეტის ფარგლებში დაინიშნა სპეციალური მომხსენებელი, რომელიც ამ საკითხს ამზადებს იმისთვის, რომ კომიტეტმა განიხილოს. ერთ-ერთი ასეთი სხდომა 7 აპრილს არის ჩანიშნული, შესაბამისად, ლოგიკურია ვივარაუდოთ, რომ სწორედ აქ იყოს განხილული ან შემდეგ სხდომაზე. ეს არის იმ პროცედურის ნაწილი, რომელიც გულისხმობს მომზადებული საკითხის კომიტეტის შიგნით განხილვას, კენჭისყრას და კენჭისყრის შემდეგ გავა საკითხი უკვე პლენარულ სხდომაზე. რაც შეეხება საბჭოს, მასში სხვადასხვა ქვეყნის შინაგან საქმეთა და იუსტიციის მინისტრები მონაწილეობენ, შესაბამისად, სხვადასხვა დედაქალაქებში მუშაობა პარალელურ რეჟიმში გრძელდება", - განაცხადა ბაქრაძემ.


შეკითხვაზე, მოესწრება თუ არა პროცედურების დასრულება ზაფხულში, სახელმწიფო მინისტრმა უპასუხა, რომ კონკრეტული თარიღების დასახელება სწორი არ არის.


"ჩვენ შეგვიძლია დავეყრდნოთ ევროკომოსიის ხელმძღვანელების პოზიციებს, გამომდინარე იქედან, რომ საქართველომ თავისი ნაწილი უკვე შეასრულა და ახლა პროცედურები ბრიუსელში მიმდინარეობს. სწორედ მათი ვარაუდით, ეს უკავშირდება ზაფხულის პერიოდს და ჩვენც ამის ძალიან დიდი იმედი გვაქვს",- დასძინა დავით ბაქრაძემ.