საქართველოს პარლამენტის თავმჯდომარემ, დავით უსუფაშვილმა სახალხო დიპლომატიის საკითხებში ნატოს გენერალური მდივნის თანაშემწესთან, ტედ უაითსაიდთან შეხვედრა გამართა.

მხარეებმა საქართველოში მიმდინარე ნატოს კვირეულზე ისაუბრეს, რომელიც ნატო-საქართველოს სახალხო დიპლომატიის ფორუმით დაიწყო. როგორც ტედ უაითსაიდმა აღნიშნა, აღნიშნული ღონისძიებისადმი ხელისუფლების და საზოგადოების მხრიდან მაღალი ინტერესი და აქტიური ჩართულობა გამოიკვეთა, რაც ძალიან მნიშვნელოვანია.

შეხვედრაზე ისაუბრეს პროპაგანდისა და დეზინფორმაციის საფრთხეებზე, რომელიც თანამედროვე მედიასივრცეში არსებობს. იმსჯელეს ხელისუფლებასა და ხალხს შორის ეფექტური კომუნიკაციის მნიშვნელობაზეც. ნატოს გენერალური მდივნის თანაშემწის თქმით, ხელისუფლებასა და საზოგადოებას შორის კომუნიკაციისა და სწორი ინფორმაციის მიმოცვლის პრობლემა, გარკვეულწილად, ყველა ქვეყანაშია და ამის გადასაჭრელად, საჭიროა, შესაბამისი მექანიზმები იქნას შემუშავებული. მისივე განცხადებით, ყველა პროექტს, მათ შორის, თავდაცვის სფეროში, მკაფიო სტრატეგიული საკომუნიკაციო გეგმა სჭირდება, რათა პროექტის მნიშვნელობისა და სარგებლის შესახებ საზოგადოებრივი ცნობიერების ამაღლება მოხდეს. ტედ უაითსაიდის განცხადებით, ასევე მნიშვნელოვანია, რომ საერთაშორისო ასპარეზზე საქართველოს ევროატლანტიკური მისწრაფებების შესახებ ინფორმაციას რაც შეიძლება მეტი სუბიექტი ფლობდეს.

საუბარი შეეხო მოახლოებულ ნატოს ვარშავის სამიტსაც. დავით უსუფაშვილმა იმედი გამოთქვა, რომ სამიტზე საქართველოს მიერ მიღწეულ პროგრესს პარტნიორი ქვეყნები კიდევ ერთხელ, ხაზგასმით აღნიშნავენ. პარლამენტის თავმჯდომარის განცხადებით, ქვეყანა ნატოსკენ სწრაფვას უფრო აქტიურად გააგრძელებს.