„ადიგენის მუნიციპალიტეტში 2016 წლის განმავლობაში 4 დიდი ინფრასტრუქტურული პროექტი განხორციელდება“ - აღნიშნული განცხადება guardian.ge-სთან საუბრისას ადიგენის მუნიციპალიტეტის გამგებელმა, ზაქარია ენდელაძემ გააკეთა.


ენდელაძის ცნობით, პროექტებს რეგიონული განვითარების ფონდი აფინანსებს და ჯამში მათ განსახორციელებლად, 2 142 000 ლარი დაიხარჯება.


„წელს დაგეგმილი გვაქვს ქვემო ენთელი-ფხერის მიმართულებით ასფალტის დაგება. ჩორჩანის, დიდი სმადას, პატარა სმადას სასმელი წყლის ქსელის მშენებლობა. ზანავი-პატარა ზანავი-ჭელას მონასტრის მიმართულებით გზის მოასფალტება. დაბა ადიგენის ადმინისტრაციული ცენტრის ქუჩების - ბალახაშვილისა და ჩადუნელის მოასფალტება.


აღნიშულ პროექტებზე გამოცხადებულია ტენდერები, აქედან სამი გამარჯვებული უკვე გამოვლენილია, დადებულია ხელშეკრულება, ერთი პროექტის განხორციელება უკვე დაწყებულია, ორი კი ამ დღეებში იწყება. რაც შეეხება სასმელი წყლის ქსელის მშენებლობას, როგორც კი ხელს შეგვიწყობს კლიმატური პირობები, დავიწყებთ მუშაობას. მთიდან არის წყალი ჩამოსაყვანი და ჯერ ადიგენის მთაში თოვლია ისევ. მე ვფიქრობ, რომ ეს ოთხი პროექტი არის საკმაოდ თამამი ნაბიჯი ჩვენი მხრიდან. გვინდა რომ სამუშაოების დასრულების შემდეგ, მოსახლეობა კმაყოფილი იყოს“ - განაცხადა ადიგენის მუნიციპალიტეტის გამგებელმა.


მისივე ცნობით, სხვადასხვა პროექტების განხორციელება ადგილობრივი ბიუჯეტის დაფინანსებითაც იგეგმება. ენდელაძე იმედს გამოთქვამს, მიმდინარე წლის განმავლობაში, მუნიციპალიტეტს მნიშვნელოვანი და აუცილებელი აქტივობები ექნება.


„ადგილობრივი ბიუჯეტით დაფინანსებული ზოგი პროექტი უკვე დაწყებულია, ზოგიც უახლოეს პერიოდში დაიწყება, ზოგის მომზადების პერიოდი კი ახლა მიმდინარეობს, კვარტლების მიხედვით გვაქვს დაგეგმილი ყველაფერი. ჯამში, რამდენიმე ათეულ პროექტს განვახორციელებთ, მათ შორის, საბავშვო ბაღების მშენებლობა, სკვერების მოწყობა, წყლის სათავე ნაგებობების მშენებლობა, მუსიკალური სკოლისა და ბიბლიოთეკის რეაბილიტაციაა“ - აღნიშნა ზაქარია ენდელაძემ guardian.ge-სთან საუბრისას.