ვიცე-პრემიერის, ეკონომიკისა და მდგრადი განვითარების მინისტრის, დიმიტრი ქუმსიშვილის განცხადებით, ავიაკომპანიებთან აქტიური მუშაობა მიმდინარეობს იმისთვის, რომ ბილეთი იაფი ღირდეს და რაც შეიძლება მეტი სტუმარი ჩამოვიდეს საქართველოში.

„ძალიან აქტიურად მიდის სამუშაოები თბილისის აეროპორტში. 31 ივნისს პრაქტიკულად განახლებული ასაფრენ-დასაფრენი ზოლი გვექნება და შესაბამისად, მთელ ამ პერიოდში საკმაოდ დაძაბული გრაფიკია აეროპორტში იმიტომ, რომ 20.00 საათიდან 10.00 საათამდე ვიღებთ სტუმრებს“, - განაცხადა დიმიტრი ქუმსიშვილმა.

ქუმსიშვილი ტურიზმის სექტორს მოუწოდებს, რომ ფასებთან მიმართებაში ძალიან ფრთხილები იყვნენ.

„რამდენიმე კვლევის მიხედვით, საქართველოზე მოთხოვნა მკვეთრადაა გაზრდილი, თუმცა აქვე მინდა აღვნიშნო და ჩვენ ტურიზმის სექტორს მოვუწოდო, რომ ისინი ძალიან ფრთხილები იყვნენ ფასებთან მიმართებაში, იმიტომ, რომ გვყავს არაერთი კონკურენტი ჩვენი მეზობელი და შესაბამისად, მათ უნდა ახსოვდეთ, რომ ფასები და სერვისის შესაბამისობა მნიშვნელოვანი იქნება. ამიტომ ჩვენ არ უნდა დავკარგოთ ის სტუმრები, ვისაც ჩამოსვლა სურთ“, - განაცხადა დიმიტრი ქუმსიშვილმა.

მინისტრის განცხადებით, წელს ტურიზმიდან გაცილებით მეტ შემოსავალს ელიან, ვიდრე იყო შარშან.

ქუმსიშვილის თქმით, შარშან ტურიზმმა დააგენერირა 1 მილიარდ 935 მილიონი დოლარი, რაც 148 მილიონი დოლარით მეტი იყო, ვიდრე 2014 წელს.