მთავრობის განკარგულებით წალკის, თეთრიწყაროსა და ნინოწმინდის მუნიციპალიტეტებში მცხოვრები 215 ეკომიგრანტი ოჯახი საცხოვრებელი სახლის მესაკუთრე გახდა.

დევნილთა და განსახლების სამინისტროს ინფორმაციით, სოზარ სუბარი წალკის მუნიციპალიტეტის გამგეობის შენობაში სტიქიით დაზარალებულ ოჯახებს შეხვდა და საცხოვრებელი ფართის საკუთრების დამადასტურებელი ხელშეკრულებები გადასცა.

საკუთრების დამადასტურებელი მოწმობების გადაცემის შემდგომ, მინისტრმა სოზარ სუბარმა, ქვემო ქართლის გუბერნატორმა პაატა ხიზანაშვილმა და აჭარის მთავრობის წარმომადგენლებმა ეკომიგრანტი ოჯახების სახლები ადგილზე მოინახულეს.

წინა წლებში სამინისტრო სტიქიით დაზარალებულ ოჯახებს საცხოვრებელ სახლებს საკუთრებაში არ გადასცემდა. განსახლებული ოჯახების უმეტესობას არ ჰქონდა საკუთრების უფლების განცდა, რაც ახალ სამოსახლო ადგილზე ადაპტაციის პროცესს ხელს უშლიდა. არსებული პრობლემის აღმოსაფხვრელად, სამინისტრომ სახლების კერძო საკუთრებაში გადაცემის გადაწყვეტილება მიიღო.

საქართველოს მთავრობის 2015 წლის განკარგულებით მოხდა 2004-2009 წლებში ეკომიგრანტი ოჯახებისთვის შესყიდული საცხოვრებელი სახლებისა და მიწის ნაკვეთების აზომვითი საკადასტრო ნახაზების მომზადება და სახელმწიფო საკუთრებად მათი ხელახალი რეგისტრაცია. ამავე პროექტის ფარგლებში,მათი შემდგომი დაკანონების მიზნით, ამ სახლებში მცხოვრები ოჯახების აღწერაც განხორციელდა.

2016 წლიდან დაიწყო პროცესი, რომელსაც აჭარისა და სვანეთის რეგიონებიდან წალკის მუნიციპალიტეტში ჩასახლებული ეკომიგრანტი ოჯახები წლების განმავლობაში ელოდებოდნენ.

ამ ეტაპზე მთავრობის განკარგულებით საცხოვრებელი ფართი უკვე დაუკანონდა 215 ეკომიგრანტ ოჯახს. სახლებისა და მიწის ნაკვეთების დაკანონების პროცესი გრძელდება და წლის ბოლომდე წალკის, თეთრიწყაროსა და ნინოწმინდის მუნიციპალიტეტებში საცხოვრებელი ფართის მესაკუთრე 1000-მდე ეკომიგრანტი ოჯახი გახდება.

საცხოვრებელი ფართების დაკანონების პროექტის პარალელურად, სამინისტრო 2013 წლიდან, სტიქიით დაზარალებული და გადაადგილებას დაქვემდებარებული ოჯახებისთვის საცხოვრებელი სახლების შესყიდვის პროგრამასაც ახორციელებს.

2013 წლიდან დღემდე სამინისტრომ საცხოვრებელი სახლი 200-ზე მეტი ეკომიგრანტი ოჯახისთვის შეისყიდა, წლის ბოლომდე კი უსაფრთხო გარემოში კიდევ 65 ოჯახი განსახლდება.

დევნილთა და განსახლების მინისტრმა სოზარ სუბარმა სამინისტროს მიერ წალკის მუნიციპალიტეტში შესყიდული სახლებიც მოინახულა და ეკომიგრანტი ოჯახების საცხოვრებელ პირობებს პირადად გაეცნო. გასულ წელს სამინისტრომ წალკის მუნიციპალიტეტში სტიქიით დაზარალებული ოჯახებისთვის 10 სახლი შეიძინა.