2016 წლის საპარლამენტო არჩევნების თარიღთან დაკავშირებით პრეზიდენტის მიერ გამოცემული განკარგულება, რომელიც არჩევნების დღედ 8 ოქტომბერს განსაზღვრავს და რომელიც კონტრასიგნაციის მიზნით პრემიერ მინისტრთან არის გადაგზავნილი, შესაძლოა უკან იყოს გაწვეული. პროცესის ამგვარად წარმართვა არ გამორიცხა უშიშროების საბჭოს მდივანმა ირინა იმერლიშვილმა.


შეკითხვაზე: შეიძლება თუ არა პრეზიდენტმა უკან გაიწვიოს თავისი განკარგულება? - ირინა იმერლიშვილმა უპასუხა, რომ "ყველა ვარიანტი განიხილება".


"ყველაფერზე მიდის საუბარი, ყველა ვერსიაზე, რაც არის დღეს საკამათო, რაზეც მსჯელობენ არასამთავრობო ორგანიზაციები, პოლიტიკური პარტიები და ა.შ., ოღონდ ჯერ საბოლოო გადაწყვეტილება არ არის მიღწეული. როცა იქნება საბოლოო შეთანხმება, ცენტრალური საარჩევნო კომისია გააკეთებს კალენდარს. მოგეხსენებათ, პრემიერი და პრეზიდენტი შეხვდნენ ერთმანეთს და ეს იყო ერთობლივი გადაწყვეტილება არჩევნების დღესთან დაკავშირებით", - განაცხადა იმერლიშვილმა გუშინ საღამოს, პარლამენტისა და ცესკოს თავმჯდომარეებთან სამუშაო შეხვედრის დასრულების შემდეგ.


საპარლამენტო არჩევნების დანიშვნის შესახებ განკარგულება საქართველოს პრეზიდენტმა 5 აპრილს გამოსცა და პრემიერ-მინისტრს ხელმოსაწერად გადაუგზავნა. პრემიერ მინისტრს კი კონტრასიგნაციისთვის გადაცემული პრეზიდენტის სამართლებრივი აქტის მთავრობის სხდომაზე გასატანად და განსახილველად 10-დღიანი ვადა აქვს.


გიორგი მარგველაშვილის განკარგულების მიხედვით, საქართველოს პარლამენტის მორიგი არჩევნები 2016 წლის 8 ოქტომბერს გაიმართება. აღნიშნული განკარგულები კი ძალაში 2016 წლის 8 აგვისტოდან შევა, რითაც წინასაარჩევნო კამპანიის დაწყებისა და მასთან დაკავშირებული საარჩევნო რეგულაციების ამოქმედების გადავადება ხდება.