ჩაქვის N2 საჯარო სკოლას საქართველოს ერთიანობისათვის ბრძოლაში დაღუპული ჯარისკაცის ჯემალ არძენაძის სახელი მიენიჭა.


სკოლის ახალი აბრის საზეიმო გახსნას აჭარის ავტონომიური რესპუბლიკის განათლების, კულტურისა და სპორტის მინისტრი გიორგი თავამაიშვილი, აჭარის უმაღლესი საბჭოს თავმჯდომარე ავთანდილ ბერიძე, ქობულეთის მაჟორიტარი დეპუტატი ანზორ თხილაიშვილი და ქობულეთის მუნიციპალიტეტის ხელმძღვანელი პირები ესწრებოდნენ.


ჯემალ არძენაძე დაიბადა 1972 წლის 25 ნოემბერს ქობულეთის რაიონის სოფელ ჩაისუბანში. 1979 წელს სწავლა დაიწყო ჩაქვის №2 საშუალო სკოლაში. 1992 წლის 31 აგვისტოს ქობულეთის სამხედრო კომისარიატის მიერ გაწვეული იქნა სამხედო სავალდებულო სამსახურში, მსახურობდა სამხედრო ნაწილ №2060- ში. 1992 წლის 25 ოქტომბერს, როგორც მოწინავე ჯარისკაცი გაგზავნილი იქნა ქალაქ თბილისში უმცროს მეთაურთა სკოლაში, სადაც ჩაირიცხა სადესანტო - სადივერსიო ასეულში.


შსს შინაგანი ჯარების რიგითი ჯარისკაცი ჯემალ არძენაძე გმირულად დაიღუპა 1992 წლის 6 დეკემბერს, საქართველოს ერთიანობისა და მთლიანობისათვის ბრძოლაში, ოჩამჩირის რაიონის სოფელ ტამიშთან. იგი სიკვდილის შემდეგ დაჯილდოვებულია მედლით მხედრული მამაცობისათვის.


ჯემალ არძენაძის სახელი შეტანილი იქნა საქართველოს ჯარების მუდმივ სიაში, მისი სახელი და გვარი ამოტვიფრულია ქალაქ თბილისში და ქობულეთის გმირთა მემორიალურ დაფებზე.


სკოლის სახელის მინიჭების ღონისძიებაზე მოსწავლეებმა მხატვრული წარმოდგენა გამართეს. საზეიმო ცერემონიალს ჯემალ არძენაძის ოჯახის წევრები, სკოლის პედაგოგები და სოფლის მოსახლეობა ესწრებოდა.