ცხინვალი არის ოკუპირებული ტერიტორია და ყველა პროცესი, მათ შორის ე.წ. რეფერენდუმი არის არალეგიტიმური, - განაცხადა შერიგებისა და სამოქალაქო თანასწორობის საკითხებში სახელმწიფო მინისტრის პირველმა მოადგილემ, ქეთევან ციხელაშვილმა.

”ურთიერთგამომრიცხავი განცხადებები ვრცელდება. ძალიან ხშირად თვითონ თიბილოვი აღნიშნავს, რომ თითქოს ოსი ხალხის პირველი ამოცანა - დამოუკიდებლობა, არის მიღწეული, ხოლო მეორე ამოცანა და ოცნება არის რუსეთთან შეერთება. ეს თავისთავად წინააღმდეგობრივია, რაც ხაზს უსვამს იმას, რომ ეს პროცესი მთლიანად გამოიყენება ერთი დანიშნულებით - ეს არის საქართველოს პოლიტიკური შანტაჟის მცდელობა.

პოლიტიკურად ეს განწირულია საერთაშორისო თანამეგობრობის მხრიდან. მათი პოზიცია არის ცალსახა - ეს არის არაღიარების პოლიტიკა და საქართველოს ტერიტორიული მთლიანობის, სუვერენიტეტის მხარდაჭერა. ასევე აღსანიშნავია ის, რომ ეს ე.წ. რეფერენდუმი პრაქტიკაშიც ვერანაიარად ვერ დაუკავშირდება ვინმეს ნებას, იმიტომ, რომ ეს რეგიონი ფაქტობრივად დაცლილია მოსახლეობისგან. 90-იანი წლების კონფლიქტამდე მოსახლეობის 80% დღეს აღარ ცხოვრობს ცხინვალის რეგიონში, აქედან უმეტესობა გამოდევნილია, მაგრამ სხვებმა დატოვეს იმიტომ, რომ არის თვითოზილირებული რეგიონი”, - აღნიშნა სახელმწიფო მინისტრის მოადგილემ.

ე.წ. სამხრეთ ოსეთი რუსეთთან შეერთების საკითხთან დაკავშირებით აგვისტომდე რეფერენდუმის ჩატარებას გეგმავს, - ამის შესახებ ე.წ პრეზიდენტმა ლეონიდ თიბილოვმა რუსულ მედიასთან ინტერვიუში განაცხადა.