ფინანსთა სამინისტროს საგამოძიებო სამსახურის თანამშრომლებმა, განსაკუთრებით დიდი ოდენობით თანხის თაღლითურად დაუფლების ფაქტზე, სამშენებლო კომპანა შპს ,,იბერია სითი"-ს დირექტორი გიორგი გოგიბერიძე დააკავეს.

გამოძიებამ დაადგინა, რომ გიორგი გოგიბერიძე მის კუთვნილებაში მყოფი სამშენებლო კომპანიის, შპს ,,იბერია სითი"-ს სახელით 2005-2008 წლებში მოქალაქეებთან ხელშეკრულებებს აფორმებდა, რის საფუძველზეც იგი იღებდა ვალდებულებას, რომ ხელშკრულებით გათვალისწინებული ღირებულების გადახდის შემდეგ, საქართველოს ტექნიკური უნივერსიტეტის მიმდებარე ტერიტორიაზე მრავალბინიანი საცხოვრებელი სახლის ,,ა" და ,,ბ" კორპუსს ააშენებდა, აშენების შემდეგ კი ხელშეკრულებაში გათვალისწინებულ ბინებს (შესაბამისი ფართებით) საკუთრებაში კონტრაქტორ მოქალაქეებს გადაუფორმებდა.

საგამოძიებო სამსახურის ინფორმაციით, ნაკისრი ვალდებულებისა და გაფორმებული ხელშეკრულებების მიუხედავად, საცხოვრებელი კორპუსების აშენების შემდეგ, გიორგი გოგიბერიძემ აღნიშნული ბინები მოტყუებით, თითქოს და მის საკუთრებას წარმოადგენდა, იპოთეკით დატვირთა და შემდგომში გაასხვისა სხვა, არაკონტრაქტორ მოქალაქეებზე.

სამსახურის ცნობით, აღნიშნული გზით გიორგი გოგიბერიძემ დამატებით მიიღო უკანონო შემოსავალი და 2005-2008 წლებში გაფორმებული ხელშეკრულების საფუძველზე მიღებულ განსაკუთრებით დიდი ოდენობით თანხას, 1 626 291 აშშ დოლარს თაღლითურად დაეუფლა, რამაც კონტრაქტორი მოქალაქეები მნიშვნელოვანად დააზარალა.

ამ ეტაპზე, დადგენილია ათეულობით მოქალაქის კუთვნილი თანხის მოტყუებით დაუფლების ფაქტი. გამოძიება საქართველოს სისხლის სამართლის კოდექსის 180-ე მუხლის მე-3 ნაწილის ,,ა" და "ბ" ქვეპუნქტებით მიმდინარეობს, რაც თავისუფლების აღკვეთას 6 დან 9 წლამდე ვადით ითვალისწინებს. გამოძიება. ასევე, ზემოხსენებულ საცხოვრებელ კორპუსებსა და ასევე, გოგიბერიძის მიერ აშენებულ სხვა საცხოვრებელ კორპუსებში განთავსებული ბინების განკარგვის კანონიერების შემოწმების მიზნით გრძელდება.