Freedom House-ის ანგარიშში სახელწოდებით „ქვეყნები გარდამავალ პერიოდში 2016“ საქართველოს ყოფილი პრემიერ მინისტრის ბიძინა ივანიშვილის და საქართველოს ყოფილი პრეზიდენტის მიხეილ საააკაშვილის შესახებაც არის საუბარი.


საქართველოში ეროვნული დემოკრატიული მმართველობის მდგომარეობის აღწერისას, ავტორი წერს, რომ, ფართოდ გავრცელებული მოსაზრებით, ბიძინა ივანიშვილი საქართველოს პოლიტიკურ ცხოვრებაში მნიშვნელოვან როლს თამაშობს.


„სახელმწიფო საქმეებში მისი ჩარევის დონის გაუმჭვირვალობა დაძაბულობისა და არეულობის მუდმივი მიზეზია“, - წერს მაიკლ ჩეჩირე და იქვე აღნიშნავს, რომ ოდესის გუბერნატორი მიხეილ სააკაშვილი, მიუხედავად იმისა, რომ საქართველოს მოქალაქეობა აღარ აქვს, კვლავ მონაწილეობს გადაწყვეტილებების მიღების პროცესში „ერთიან ნაციონალური მოძრაობასთან“ ერთად.


თავში, რომელშიც აღწერილია საქართველოში ეროვნული დემოკრატიული მმართველობის დონე, ნათქვამია, რომ ქართული საზოგადოების ზოგიერთი სეგმენტი სულ უფრო ხშირად ემხრობა პრორუსულ და ანტიდასავლურ პოლიტიკას, აღნიშნულ ძალებს კი, მიღებული მოსაზრებით, აფინანსებს მოსკოვი იმ მოტივით, რომ "გაზარდოს გავლენა საქართველოზე და მოახდინოს ქვეყანაში ვითარების დესტაბილიზაცია“.


ანგარიშის თანახმად, წელს დაგეგმილი არჩევნები განსაკუთრებით კონკურენტუნარიანი იქნება იმის ფონზე, რომ ამომრჩევლის უმეტესობა გარკვეული ჯერ არ არის. ამას უწყობს ასევე ხელს მზარდი ანტიდასავლური განწყობები და და ანტიდასავლური პოლიტიკის მხარდაჭერის გაზრდაც.


საქართველოში არასამთავრობო სექტორის მუშაობა დადებითად ფასდება, თუმცა ავტორი იქვე აღნიშნავს, რომ ზოგიერთი არასამთავრობო ორგანიზაცია ამა თუ იმ პარტიას, მოძრაობას თუ პიროვნებას ეკუთვნის.


გარდა ამისა, ყოფილა არასამთავრობო ორგანიზაციების ერთმანეთთან როგორც სიტყვიერი ისე ფიზიკური დაპირისპირების ფაქტებიც.


„არსებობს ასევე სულ უფრო მეტი მტკიცებულება, რომ რუსეთის მთავრობასთან დაკავშირებული ჯგუფები სულ უფრო ხშირად აფინანსებენ პრომოსკოვურ, „ევრაზიულ“ არასამთავრობო ორგანიზაციებს საქართველოში“, - წერია Freedom House-ის ანგარიშში.


საქართველოში კორუფციის დონის შეფასებისას, ანგარიშის ავტორები წერენ, რომ ქართულ საზოგადოებაში ნეპოტიზმი მზარდ პრობლემას წარმოადგენს.