"ვაგრძელებთ საზოგადოებისთვის ინფორმაციის მიწოდებას, თუ როგორ მოიწყო ბიძინა ივანიშვილმა გლდანში საკუთრი ოფშორი მრავალმილიონიანი საქმის საკეთებლად" - აღნიშნული განცხადება "ერთიანი ნაციონალური მოძრაობის" ერთ-ერთმა ლიდერმა, პეტრე ცისკარიშვილმა დღეს გამართულ პრესკონფერენციაზე გააკეთა.

ჩვენ უკვე მივაწოდეთ საზოგადოებას ინფორმაცია იმისა თაობაზე, თუ როგორ გადაეცა მას 18 ჰექტარი მიწა გლდანის რაიონში 1 ლარად, ეს მოხდა მაისში ირაკლი ღარიბაშვილის განკარგულებით. ის აღნიშნულ ტერიტორიაზე არანაირ გადასახადს არ იხდის, რადგან თავისუფალ ეკონომიკურ ზონადაა გამოცხადებული. ესაა ბითკოინების მოპოვებისთვის საჭირო სასერვერო სისტემა, სადაც რამდენიმე ადამიანი თუ იმუშავებს დარაჯად და სერვერების გადასატვირთვად.

დღეს მინდა მის მთავარ მოტივაციაზე ვისაუბრო - თუ რატომ გააკეთა ეს ოფშორი, რომელიც დენის დანახარჯების დაზოგვას წარმოადგენს. საწარმო გლდანში მოიხმარს 40 მეგავატ სიმძლავრეს, რომელიც მთელი კახეთის სიმძლავრეს უდრის. რაც შეეხება ტარიფს, თუ საშუალო ფენის ადამიანები იხდიან 17 თეთრს, შეძლებული ოჯახები 21 თეთრს, ბიძინა ივანიშვილი გადაიხდის 11.8 თეთრს. ეს იყო მისი მთავარი მოტივაცია. ასე ის ერთი წლის განმავლობაში 7 მილიონ ლარს დაზოგავს" - აღნიშნა ცისკარიშვილმა.