დიდი ბრიტანეთის ევროკავშირიდან გასვლამ შესაძლოა "მწვავე რეგიონული და გლობალური ზიანი" გამოიწვიოს. ამგვარ გამაფრთხილებელ მოსაზრებას საერთაშორისო სავალუტო ფონდი ავრცელებს.


ე.წ. "Brexit" -ი (შენიშვნა: Brexit-ი, "British exit"-ის აბრევიატურაა, რაც უკავშირდება იმის შესაძლებლობას, რომ ბრიტანეთი გავიდეს ევროკავშირიდან) მოშლის დაფუძნებულ სავაჭრო ურთიერთობებს და "მთავარი გამოწვევების" წინაშე დააყენებს, როგორც დიდ ბრიტანეთს, ისე ევროპას, აცხადებენ საერთაშორისო სავალუტო ფონდში. მათივე მოსაზრებით, რეფერენდუმმა უკვე შექმნა გაურკვევლობა ინვესტორებში და ევროკავშირიდან გასვლაზე კენჭისყრა მხოლოდ გააძლიერებს ამას.  


საერთაშორისო სავალუტო ფონდი, ერთ-ერთი მთავარი დედაბოძი მსოფლიო ეკონომიკური წესრიგისა, რომელიც აღჭურვილია მანდატით ზედამხედველობა გაუწიოს საერთაშორისო მონეტარულ და ფინანსურ სისტემას, ასევე დიდი ბრიტანეთის ეკონომიკის ზრდის მის მიერ ნაწინასწარმეტყველებ ციფრებს ამცირებს. იგი ახლა დიდი ბრიტანეთის 2016 წლის ეკონომიკის 1.9%-ით ზრდას მოელის, მაშინ როცა იანვრის შეფასებით, ზრდა 2.2% უნდა ყოფილიყო. მომავალ წელს კი 2.2% ზრდას მოელის და ამ კუთხით ადრინდელ პროგნოზს უცვლელად ტოვებს.


თუ კი 23 ივნისის რეფერენდუმზე ამომრჩეველთა უმეტესობა ხმას მისცემს ევროკავშირის დატოვებას, საერთაშორისო სავალუტო ფონდი უკვე ევროკავშირიდან გასულ ბრიტანეთთან შეთანხმებების გაჭიანურებას მოელის, რაც, როგორც  ის გამაფრთხილებლად აცხადებს, "შესაძლოა მძიმედ დააწვეს ნდობასა და ინვესტიციას, მაშინ როცა ყოველივე ეს გაზრდის ფინანსური ბაზრის მერყეობას".


სავალუტო ფონდი ასევე დარწმუნებულია, რომ დიდი ბრიტანეთის მიერ ევროკავშირის დატოვება შეაფერხებს და შეამცირებს ორმხრივ სავაჭრო და ფინანსურ ნაკადებს" და შეზღუდავს ეკონომიკური თანამშრომლობისა და ინტეგრაციისაგან მიღებულ სარგებელს.