გაეროს გენერალური მდივნის პოსტის დასაკავებლად ბრძოლა დაიწყო. სამშაბათს უკვე რამდენიმე კანდიდატის ვინაობა გახდა ცნობილი. გაეროს გენერალური მდივნის თანამდებობაზე ჯერჯერობით 9 ოფიციალური კანდიდატია დასახელებული და მოელიან, რომ ეს რიცხვი კიდევ უფრო გაიზრდება. ამის შესახებ CNN წერს.


ოფიციალურად თავიანთი კანდიდატურები უკვე წარმოადგინეს სლოვენიის ყოფილმა პრეზიდენტმა, მონტენეგროს პრემიერ მინისტრის  მოადგილემ, მაკედონიის ყოფილმა საგარეო საქმეთა მინისტრმა, ხორვატიის ყოფილმა საგარეო საქმეთა მინისტრმა, სერბეთის ყოფილმა საგარეო საქმეთა მინისტრმა და აგრეთვე მოლდოვას ყოფილმა საგარეო საქმეთა მინისტრმა.


კანდიდატებს შორის არის გაეროს სააგენტოების ორი ამჟამინდელი ლიდერი: ირინა ბოკოვა UNESCO -დან და ჰელენ კლარკი გაეროს განვითარების პროგრამიდან, მე-9 კი გაეროს დევნილთა სააგენტოს ყოფილი ხელმძღვანელი ანტონიო გატერესია.


მთავარი ინტერესი კი მდგომარეობს იმაში, გახდება თუ არა პირველად გაეროს ისტორიაში მისი გენერალური მდივანი ქალბატონი, დიპლომატები კი ფიქრობენ, იბრძოლებს თუ არა ამ პოსტისთვის გერმანიის კანცლერი ანგელა მერკელი.


CNN -ის თანახმად, ახალი გენერალური მდივნის არჩევის პროცედურა ასეთია: გაეროს უშიშროების საბჭო კანდიდატს "რეკომენდაციას" უწევს 193-წევრიან გაეროს გენერალურ ასამბლეაში, რომელიც ჩვეულებრივ არ აწარმოებს საჯარო კენჭისყრას, მაგრამ კონსენსუსით იწონებს. კენჭისყრას კი უშიშროების საბჭოს 5 მუდმივმოქმედი წევრი ქვეყანა ატარებს. ამგვარად, თუ მათ არ მოსწონთ კანდიდატი, მისი ბედიც გადაწყვეტილია. უშიშროების საბჭო კი მიმდინარე წლის სექტემბერში მიიღებს გადაწყვეტილებას და გამარჯვებული სავარაუდოდ ოქტომბერში გამოცხადდება.


ახალი გენერალური მდივანი მუშაობას 2017 წლის 1 იანვარს შეუდგება.