სოფელ ხუცუბანში მრავალწლიანი პრობლემა მოგვარდა. 800-ზე მეტ აბონენტს სასმელი წყალი შეუზღუდავად მიეწოდება, - ამის შესახებ guardian.ge -ს ქობულეთის მუნიციპალიტეტის გამგეობიდან აცნობეს.


დღეს აჭარის მთავრობის თავმჯდომარე არჩილ ხაბაძე აჭარის ფინანსთა და ეკონომიკის მინისტრთან და ქობულეთის მუნიციპალიტეტის ხელმძღვანელ პირებთან ერთად სოფელ ხუცუბანში მერაბ ბლადაძის ოჯახში იმყოფებოდა და იქ არსებულ მდგომარეობას ადგილზე გაეცნო.


ქობულეთის მუნიციპალიტეტის გამგეობის პრეს-სამსახურის ცნობით, ხუცუბანში წყალსადენი სისტემის რეაბილიტაცია მრავალწლიანი პროექტია. გასულ წელს პროექტის პირველი ეტაპი განხორციელდა. ინფრასტრუქტურული ღონისძიების ფარგლებში სათავე ნაგებობები და ცენტრალური მაგისტრალი მოეწყო, ასევე რეაბილიტაცია ჩაუტარდა არსებულ რეზერვუარებს. განხორციელებული სამუშაოების შედეგად გაიზარდა წყლის დებეტი და სასმელი და სამეურნეო წყალი შეუზღუდავად მიეწოდება ისეთ ოჯახებს, სადაც წყალმომარაგება არასდროს არ არსებობდა.


ხუცუბნის წყალსადენი სისტემის სარეაბილიტაციო სამუშაოები წელსაც გრძელდება. მალე პროექტის მეორე ეტაპის განხორციელება დაიწყება, რომელიც შიდა მაგისტრალური ქსელის მოწყობასა და აბონენტთა გამრიცხველიანობას ითვალისწინებს. პროექტის განხორციელებისთვის 1 124 000 ლარია გამოყოფილი. ხუცუბნის წყალსადენი სისტემის სრული რეაბილიტაცია ნოემბრის თვეში დასრულდება. პროექტის განსახორციელებლად ჯამში 2 284 000 ლარი დაიხარჯება და 1400-მდე ოჯახი უზრუნველყოფილი იქნება სასმელი წყლით.