თბილისში რეზო ჩხეიძისა და კოტე მახარაძის სახელობის ქუჩები იქნება. დედაქალაქის მუნიციპალიტეტის საკრებულოში სახელდებისა და სიმბოლიკის კომისიის სხდომა გაიმართა, რომელზეც კომისიის წევრებმა თბილისში რამდენიმე უსახელო ქუჩისთვის სახელის მინიჭების თაობაზე იმსჯელეს და დადებითი რეკომენდაცია მისცეს.

სხვა საკითხებთან ერთად, კომისიის წევრებმა თბილისში, მთაწმინდის რაიონში, ლარსის ქუჩის შესახვევისთვის კინორეჟისორის რეზო ჩხეიძისა და მთაწმინდის რაიონში, იაკობ ნიკოლაძის ქუჩის I ჩიხისთვის საზოგადო მოღვაწის კოტე მახარაძის სახელების მინიჭებას დაუჭირეს მხარი.

დღესვე, სხდომაზე წარმომადგენლობითი ორგანოს წევრებმა ვაკის რაიონში, სოფელ კვესეთში მდებარე უსახელო ქუჩებისთვის და უსახელო ჩიხისთვის, საბურთალოს რაიონში, ძველი ვეძისის დასახლებაში მდებარე უსახელო ქუჩებისთვის მათთან არსებული შესახვევისთვის, ჩიხებისთვის და გასასვლელისთვის და ასეევ ქ.თბილისში, ვაკის რაიონში, სოფელ აგარაკში მდებარე უსახელო ქუჩებისთვის მათთან არსებული ჩიხებისთვის და გასასვლელებისთვის 9 აპრილის ტრაგედიის დროს დაღუპულთა სახელების მინიჭების საკითხებს დადებითი რეკომენდაცია მისცეს.

„რეზო ჩხეიძე ლარსის ქუჩაზე ცხოვრობდა და იქ არის ლარსის შესახვევი, რომელიც უკვე ქუჩად ჩამოყალიბდა. რაც შეეხება კოტე მახარაძის სახელობის ქუჩას, ფიქრის გორაზე ჩვენ გვაქვს ცალკე შესახვევი, რომელიც ასევე ცალკე ქუჩად ჩამოყალიბდა და მას დაერქმევა კოტე მახარაძის სახელი. გარდა ამისა, შემოერთებული სოფლები ქვემო ვეძისი, კვესეთი და აგარაკები, სადაც ჩვენ 9 აპრილთან დაკავსირებით ვაკეთებთ სახელდებას და 16 გარდაცვლილის სახელი დაერქმევა იქ ქუჩებს. 9 აპრილს გარდაცვლილი 16 გმირი იყო დარჩენილი, რომელთა სახელობის ქუჩები არ არსებობდა“, _ განაცხადა სახელდებისა და სიმბოლიკის კომისიის თავმჯდომარემ ლია ჯახველაძემ.

კომისიის რეკომენდაციებს დეპუტატები საკრებულოს უახლოეს სხდომაზე განიხილავენ.