„რესპუბლიკური პარტიის“ წევრი თამარ კორძაია საპარლამენტო არჩევნების თარიღთან დაკავშირებით მიმდინარე პროცესებს ეხმიანება.

„როცა არჩევნების დღე გამოცხადებულია და 8 ოქტომბერთან დაკავშირებით პოლიტიკური გადაწყვეტილება მიღებულია, ვერ ვხვდები, მაისის დასაწყისში შესაბამისი განკარგულების გამოცემა და წინასაარჩევნო კამპანიის დაწყება, რა პრინციპული ამბავია, - აცხადებს კორძაია.

მისივე შეფასებით, მთავრობამ პრეზიდენტს არჩევნების დანიშვნის შესახებ განკარგულების გამოცემისა და წინასაარჩევნო კამპანიის დაწყების თარიღთან დაკავშირებით ძალიან გონივრული ვადა შესთავაზა და ამ თვალსაზრისით 8 ივლისი სრულიად მისაღები თარიღია.

”რესპუბლიკელი” დეპუტატი ყურადღებას იმაზე ამახვილებს, რომ წინასაარჩევნო კამპანიის ხუთი თვით ადრე დაწყება ტვირთია არა მხოლოდ სახელმწიფო ბიუჯეტისთვის, არამედ მედიისთვისაც, რომელსაც არჩევნებამდე 5-თვით ადრე იმ ვალდებულების შესრულება მოუწევს, რასაც მას კანონმდებლობა წინასაარჩევნო კამპანიის დროს აკისრებს.

კორძაიას თქმით, წინასაარჩევნო კამპანიის დაწყების თარიღთან დაკავშირებით ”რესპუბლიკელები” პრემიერის პოზიციას იზიარებენ.

პრემიერ-მინისტრმა გიორგი კვირიკაშვილმა არჩევნების თარიღთან დაკავშირებულ განკარგულება პრეზიდენტს მოტივირებული შენიშვნებით უკან გაუგზავნა და როგორც დღევანდელ სხდომაზე განაცხადა, წინასაარჩევნო პერიოდად აღებული უნდა იყოს 3 თვე. პრემიერის აზრით, უმჯობესი იქნება, თუკი პრეზიდენტი არჩევნებთან დაკავშირებულ განკარგულებას 8 ივლისს გამოაქვეყნებს.

თავის მხრივ პრეზიდენტმა დღეს ჟურნალისტებს განუცხადა, რომ არჩევნების თარიღთან დაკავშირებით ახალ განკარგულებას მაისის დასაწყისში გამოსცემს.