საჭიროა სახელმწიფო ინსტიტუტები და განსაკუთრებით უმაღლესი თანამდებობის პირები, ცოტა უფრო მეტი პასუხისმგებლობით მოეკიდონ სახელმწიფოებრივი მნიშვნელობის საკითხებს, -აცხადებს ახალგაზრდა იურისტთა ასოციაციის თავმჯდომარე ანა ნაცვლიშვილი.

ანა ნაცვლიშვილმა პრეზიდენტის მიერ არჩევნებთან დაკავშირებით ახალი განკარგულების ივლისის ნაცვლად მაისის დასაწყისში გამოცემასთან დაკავშირებული საკითხის კომენტირებისას განაცხადა, რომ იქმნება შთაბეჭდილება, რომ ხდება ნაჩქარევი გადაწყვეტილებების მიღება.

”მთელმა ამ პროცესმა რომელიც უკავშირდება, როგორც განკარგულების გამოცემას და შემდეგ რეაქციებს აჩვენა, რომ ის რეალობა, რომ საჭიროა სახელმწიფო ინსტიტუტები და განსაკუთრებით უმაღლესი თანამდებობის პირები ცოტა უფრო მეტი პასუხისმგებლობით მოეკიდნონ სახელმწიფოებრივი მნიშვნელობის საკითხებს და მეტი პატივიცემა გამოიჩინონ კანონთან მიმართებაში. ეს მათ შორის გულისხმობს იმას, რომ საკითხები, რომელსაც აქვს სამართლებრივი ასპექტები ჯეროვნად და დეტალურად იყოს გავლილი სფეროს სპეციალისტებთან მანამ, სანამ გაკეთდება საჯარო განცხადებები. აქ იგულისხმება ის, რომ როდესაც ხდება მნიშვნელოვანი საკითხების გადაწყვეტა, იქნებოდა ეს თარიღის გადაწყვეტა, თუ განკარგულების გამოცემა, სასურველი იყო ყოფილიყო წინასწარი კონსულტაციები იურისტებთან და გადამოწმება, იყო თუ არა ესა თუ ის გადაწყვეტილება შესაბამისობაში საქართველოს კანონდებლობასთან. დაგვრჩა შთაბეჭდილება, რომ გარკვეულწილად ნაჩქარევი გადაწყვეტილებები იქნა მიღებული. სასურველი იქნებოდა ყოფილიყო უფრო ინკლუზიური ფორმატი და ამ ფორმატში ყოფილიყო კონსულტაციები გავლილი სხვადასხვა პოლიტიკურ ძალებთან”, - განაცხადა ნაცვლიშვილმა.

მისი თქმით, ორივე განცხადებაში ჩანს საფრთხე, რომ პრეზიდენტისა და პრემიერს შორის ურთიერთობა წარიმართოს და დაუბრუნდეს ძველ ფორმატს, რომელიც იყო არაკონსტრუქციული, დამამცირებელი და დამაკნინებელი ქვეყნისთვის.