"ჯანდაცვის სისტემა, რომელიც დღეს ჩვენ გვაქვს სულაც არ არის იდეალური“ - აღნიშნული განცხადება პრემიერ-მინისტრმა, გიორგი კვირიკაშვილა ტექნოლოგიურ პარკში, მედიის წარმომადგენლებთან შეხვედრაზე გააკეთა.

პრემიერის განცხადებით, ჯანდაცვის სამინისტრო და მინისტრი ორიენტირებულია იმაზე, რომ რესურსზე იმ მოქალაქეების სასიკეთოდ გადანაწილდეს, ვისაც უფრო მეტად სჭირდება დახმარება.

„იმ მოქალაქეებს, რომლებსაც აქვთ შესაძლებლობა უზრუნველყონ საკუთარი ჯანდაცვა, სამინისტრო მოკრძალებულ პაკეტს სთავაზობს, ნაკლები შესაძლებლობის მოქალქეებისთვის კი რესურსების გადანაწილება ხდება. თუ ასეთი მოდიფიკაციებით ვიმუშავებთ, ჩვენ რა თქმა უნდა, აღარ გვექნება პრობლემები ამ კუთხით.

მედიკამენტების დაფარვა იქნება უფრო ფართო და იმ ადამიანებისთვის უფრო მეტად, ვისაც საჭიროება გააჩნია. ამას ემატება კერძო და საჯარო სექტორს შორის პარტნიორობის მოდელი. ამან მნიშვნელოვანწილად მოიტანა შედეგი, როცა მედიკამენტების გაიაფება დაიწყო და ასეც გაგრძელდება.

მინისტრებს ნამდვილად არ უნდა ჰქონდეთ საყოველთაო ჯანდაცვის პაკეტი. მინისტრები საკუთარი შემოსავლებით უნდა უზრუნველყოფდნენ საკუთარ ჯანდაცვას და მე მაქვს დღეს კერძო ჯანდაცვის პაკეტი, არ ვსარგებლობ საყოველთაო ჯანდაცვით. ადამიანებს, ვისაც გააჩნიათ საკმარისი შემოსავალი, რომ საკუთარი ჯანდაცვა თავად უზრუნველყონ, არ უნდა ჰქონდეთ სახელმწიფო ჯანდაცვის მხრიდან დაფარვა“ - აღნიშნა პრემიერმა.

ამ ეტაპზე გიორგი კვირიკაშვილი საერთო-ეროვნული მაუწყებლების პოლიტიკური თოქ-შოუების წამყვანებთან მართავს შეხვედრას, თუმცა მთავრობის ადმინისტრაციის ინფორმაციით, პრემიერ-მინისტრი, ეტაპობრივად, რეგიონული მედიის, ბეჭდური და ონლაინ-გამოცემების ჟურნალისტებსაც შეხვდება.