ქობულეთის მუნიციპალიტეტის ლეღვას ადმინისტრაციულ ერთეულში წყალსადენი სისტემის მოწყობითი სამუშაოები მიმდინარეობს. ინფრასტრუქტურული ღონისძიების განხორციელების მიზნით თვითმმართველობის ბიუჯეტიდან 869 999 ლარი დაიხარჯება.


როგორც guardian.ge-ს ქობულეთის მუნიციპალიტეტის გამგეობის პრეს-სამსაქხურიდან აცნობეს, პროექტის დასრულების შემდეგ შეუზღუდავი წყალმომარაგებით 1 000-ზე მეტი ოჯახი იქნება უზრუნველყოფილი.


დღეს სამუშაოების მიმდინარეობას გამგებლის მოადგილე ირაკლი ცეცხლაძე ინფრასტრუქტურის სამსახურის წარმომადგენლებთან ერთად ადგილზე გაეცნო.


წყალსადენი სისტემის სარეაბილიტაცია პროექტის ფარგლებში მოეწყობა რკინა-ბეტონის წყალშემკრები რეზერვუარები, აშენდება საქლორატორო, სადაც ტექნოლოგიური დანადგარები დამონტაჟდება. სათავე ნაგებობის კეთილმოწყობის შემდეგ მოეწყობა წყალსადენი სისტემის ცენტრალური მაგისტრალი, მოხდება მისი შიდა დაქსელვა და აბონენტთა გამრიცხველიანება.


წყალსადენი სისტემის მოწყობით სამუშაოებს ტენდერში გამარჯვებული კომპანია „კაპიტელი“ აწარმოებს. სამუშაოების დასრულება შემოდგომისთვის იგეგმება.