„ტყიბულის მუნიციპალიტეტში წელს მსხვილ ინფრასტრუქტურულ პროექტებზე 2 300 000 ლარი დაიხარჯება“ - განაცხადა მუნიციპალიტეტის გამგებელმა, რობიზონ გვენეტაძემ guardian.ge-სთან საუბრისას.


ტყიბულის სპორტის სახლისა და კულტურის სახლის რეაბილიტაცია, მუნიციპალიტეტის სოფლების შიდა საუბნო გზებზე ბეტონის საფარის დაგება და ქალაქის ეზოების კეთილმოწყობა - რობიზონ გვენეტაძის ცნობით, ეს ის ძირითადი პროექტებია, რომლებიც რეგიონული ფონდის დაფინანსებით მიმდინარე წელს განხორციელდება.


„მნიშვნელოვანი პროექტები გვაქვს 2016 წელს განსახორციელებელი. ნაწილი სამუშაოების დაწყებულია, ნაწილი კი უახლოეს პერიოდში დაიწყება. უკვე გვყავს ერთ ტენდერში გამოვლენილი გამარჯვებული, ეს არის სამშენებლო კომპანია „ტობე“, რომელიც სოფლების შიდა საუბნო გზების ბეტონის საფარით მოწყობით სამუშაოებს უკვე ახორციელებს. სამუშაოები უკვე დაწყებულია კურსების ადმინისტრაციულ ერთეულში, სადაც დედაღვთისას ტაძრის მიმართულებით გზა კეთდება. მსგავსი ტიპის სამუშაოები ასევე სოფელ ნაბოსლევში, წყნორში, გურნასა და ჯვარისაშიც მიმდინარეობს. პროექტები არის 60-დღიანი, შესაბამისად, თუ კლიმატურმა პირობებმა არ შეგვიშალა ხელი, ივნისის ბოლოს უნდა დასრულდეს სამუშაოები. მინდა ვუთხრა ჩვენს მოსახლეობას, რომ მობილიზებულები ვართ და ყველა საფუძველი გვაქვს იმისათვის, რომ ვადებშიც ჩავეტიოთ და ხარისხიანად შევასრულოთ ყველა სამუშაო," აღნიშნა ტყიბულის გამგებელმა.


გვენეტაძის თქმით, პარალელურად „სოფლის მხარდაჭერის პროგრამის“ ფარგლებში განსახორციელებელ პროექტებზეც იწყება მუშაობა.


„წელს, ჩვენ 433 000 ლარი გვაქვს გათვალისწინებული „სოფლის მხარდაჭერის პროგრამით“. სოფლის მოსახლეობასთან შეხვედრების შემდეგ, პრიორიტეტები გამოვლენილია, ამ ეტაპზე მიმდინარეობს საპროექტო-სახარჯთაღრიცხვო დოკუმენტაციის მომზადება. ამის შემდეგ გამოცხადდება ტენდერები და გამოვავლენთ იმ კომპანიებს, რომლებიც აღნიშნული პროგრამის ფარგლებში შესასრულებელ სამუშაოებს ჩაუდგებიან სათავეში.


ძირითადი მიმართულებები სოფლების წყლით მომარაგება და არსებული წყალგაყვანილობის სისტემის რეაბილიტაცია, ასევე განათებების დამონტაჟება და შიდა გზების მოხრეშვაა“ - აღნიშნა რობიზონ გვენეტაძემ guardian.ge-სთან საუბრისას.