აწყურის ქუჩაზე მომხდარ მკვლელობაში ბრალდებული პირი დადგენილია, - შინაგან საქმეთა სამინისტროს ინფორმაციით, ამჟამად მიმდინარეობს ბრალდებულის დაკავების მიზნით ოპერატიულ-სამძებრო ღონისძიებები.

როგორც ირკვევა, ქალი, რომელიც გარდაცვლილი იპოვეს, ნაქირავებ ბინაში შვილსა და რძალთან ერთად ცხოვრობდა.

”რძალი არასრულწლოვანი გოგონაა. მას ჩემთან ვაწყებინებდი მუშაობას, ვასწავლიდი. რამდენიმე დღე იარა, გუშინ კი ქმარმა მოაკითხა და მთხოვა, ცოტა ხნით გამეთავისუფლებინა. გავატანე მაღაზიის ტელეფონი და ვუთხარი, რომ თუ დამჭირდებოდა, დავურეკავდი. დღეს დილით შემოვიდა და ქმრისთვის სიგარეტი იყიდა. ვუთხარი, თუ ჩემთან მუშაობას აპირებ, ვერ იქნება ისე, რომ ყოველ თხოვნაზე წახვიდეთქო და ვთხოვე, თუ არ აპირებ მუშაობას, ტელეფონი დამიბრუნეთქო. მან მითხრა, აუცილებლად მოვალო და დაამატა, ჩემს ქმარს პრობლემები აქვსო“, - განაცხადა ადგილზე არსებული ერთ-ერთი მაღაზიის გამყიდველმა.

მისივე თქმით, როდესაც რამდენიმე საათის განმავლობაში გოგონა აღარ გამოჩნდა, გარეთ გაიხედა და დაინახა, რომ სახლთან ლენტი იყო გავლებული და ადგილზე პოლიციელები მუშაობდნენ.

„არ ვიცი, ვინ მოკლეს ან ვისი ცხედარია ნაპოვნი. გავიხედე და დავინახე, რომ ლენტი იყო გავლებული დ აღარ გავსულვარ გარეთ“, - განაცხადა მაღაზიის გამყიდველმა.

თვითმხილველების ინფორმაციით, სამართალდამცველებმა რამდენიმე ადამიანი წაიყვანეს, თუმცა მათთვის უცნობია, მოხდა თუ არა ვინმეს დაკავება. თბილისში, აწყურის ქუჩაზე მკვლელობა რამდენიმე საათის წინ მოხდა. გამოძიების ინტერესებისად გამომდინარე, მომხდართან დაკავშირებით საქართველოს შინაგან საქმეთა სამინისტროში დეტალებზე არ საუბრობენ.

შსს-ს ინფორმაციით გამოძიება სისხლის სამართლის კოდექსის 108-ე მუხლით მიმდინარეობს, რაც განზრახ მკვლელობას გულისხმობს.