თბილისის საქალაქო სასამართლო საპატრულო პოლიციის ყოფილი თანამშრომლების მიმართ აღკვეთის ღონისძიების სახედ გირაოს შეფარდების საკითხზე განცხადებას ავრცელებს.
განცხადებაში საქალაქო სასამართლო განმარტავს, რომ განიხილა შუამდგომლობა, მოისმინა მხარეთა განმარტებები, გაეცნო წარმოდგენილ მასალებს, შეამოწმა შუამდგომლობის დასაბუთებულობა და მიიჩნია, რომ პროკურატურის შუამდგომლობა საპატრულო პოლიციის დეპარტამენტის ყოფილი თანამშრომლების მიმართ, პატიმრობის გამოყენების თაობაზე არ უნდა დაკმაყოფილდეს.

გთავაზობთ ამონარიდს საქალაქო სასამართლოს განცხადებიდან:

”2016 წლის 21 აპრილს, თბილისის საქალაქო სასამართლოს სისხლის სამართლის საქმეთა საგამოძიებო და წინასასამართლო სხდომის კოლეგიის განჩინებით არ დაკმაყოფილდა პროკურატურის შუამდგომლობა საქართველოს შს სამინისტროს საპატრულო პოლიციის დეპარტამენტის ყოფილი თანამშრომლების ნ. ა.-სა და ა. დ.-ის მიმართ, პატიმრობის გამოყენების თაობაზე და მათ აღკვეთის ღონისძიების სახედ შეეფარდათ გირაო, თითოეულს 5000-5000 ლარის ოდენობით.

სასამართლომ განიხილა შუამდგომლობა, მოისმინა მხარეთა განმარტებები, გაეცნო წარმოდგენილ მასალებს, შეამოწმა შუამდგომლობის დასაბუთებულობა და მიიჩნია, რომ შუამდგომლობა არ უნდა დაკმაყოფილდეს, ვინაიდან ბრალდებულები ცხადდებიან საგამოძიებო ორგანოში, აქვთ მუდმივი საცხოვრებელი ადგილი და ჰყავთ ოჯახები, არ არიან ნასამართლევნი, შესაბამისად არ არსებობს მიმალვის, დანაშაულებრივი საქმიანობის გაგრძელებისა და ახალი დანაშაულის ჩადენის საფრთხეები. აღსანიშნავია, რომ ბრალდებულები არ იმყოფებოდნენ დაკავებაში, თუმცა საქმეზე კვლავ მიმდინარეობს გამოძიება, შესაბამისად მტკიცებულებათა მოპოვების ხელის შეშლის საფრთხის არსებობის გამო, სასამართლომ მიზანშეწონილად მიიჩნია, რომ ნაკლებად მკაცრი აღკვეთის ღონისძიების - გირაოს პირობებშიც მიღწევადია აღკვეთის ღონისძიების მიზნები.- ნათქვამია სასამართლოს მიერ გავრცელებულ განცხადებაში.