თბილისის საკრებულოსთან მოძრაობის „ერთად“ ორგანიზებით, პანორამა თბილისის საწინააღმდეგო აქცია გაიმართა.

„რა უნდა ზვიგენს მთაზე“, „გაიტანეთ გრენლანდია“ „პაNOრამა“ - სასტვენების ფონზე, ამ ტრანსფარანტებით გამოხატა 24-მდე ორგანიზაციამ პროტესტი პანორამა თბილისის მშენებლობის წინააღმდეგ.

აქციაში მონაწილეები მშენებლობის შეჩერებას მოითხოვენ და აცხადებენ, რომ არ დაუშვებენ ისეთი პროექტის განხორციელებას დედაქალაქში, რომელიც თბილისის ისტორიულ და კულტურულ იერსახეს დაამახინჯებს.

„ერთი თვის წინათ, პრემიერ-მინისტრის სახელზე შევიტანეთ 500-კაციანი ხელმოწერა მოთხოვნით, რომ გაგვაცნონ მდგომარეობა და მოეწყოს პროექტის განხილვა. თუმცა, პრემიერმა პასუხის ღირსადაც არ გაგვხადა და ამ დრომდე პროექტის არც კი წარმოუდგენიათ ჩვენთვის. მოგეხსენებათ, მიმდინარეობს შეუქცევადი პროცესი, ეს გახლავთ კლდის ჭრა, საინტერესოა რამდენად არის მიზანშეწონილი ქალაქისთვის ამხელა მშენებლობის დაწყება. პრემიერ-მინისტრს ვთხოვეთ შეხვედრა, არ მოგვაქცია ყურადღება, ახლა აღარ ვითხოვთ შეხვედრას, ეს არის გამაფრთხილებელი აქცია, რომ ჩვენ ცოტა ხანში, გადავალთ ჩვენს მეთოდებზე“ - აცხადებენ აქციის მონაწილეები.

პანორამა თბილისის პროექტის განხორციელებას თანაინვესტირების ფონდი გეგმავს. პროექტის თანახმად, ქალაქის ცენტრალური და ისტორიული უბნები დაუკავშირდება გამწვანებულ შემოგარენს საბაგირო გზებითა და დახრილი ლიფტებით. საუბარია სოლოლაკის მაღლობზე, სოლოლაკის ბაღებზე, თავისუფლების მოედანზე და ერეკლე მეორეს მოედანზე.