სომეხთა გენოციდის 101-ე წლისთავთან დაკავშირებით თბილისში, ავლაბრის წმინდა ეჩმიაძინის სომხური ეკლესიის მიმდებარე ტერიტორიაზე აქცია მიმდინარეობს.

საქართველოს სომეხთა სათვისტომოს საინფორმაციო ცენტრის ხელმძღვანელის, სანდრო ოჰანიანის განცხადებით, დღევანდელი აქციის მონაწილეების ერთ-ერთი მოთხოვნაა, საქართველოს ხელისუფლებამ აღიაროს სომეხთა გენოციდი.

„ჩვენ მოვითხოვთ სამართლიანობას. მოვითხოვთ, რომ თურქეთმა პასუხი აგოს ჩადენილი დანაშაულისთვის. შარშან ევროპარლამენტმა მიიღო მორიგი რეზოლუცია გენოციდის დაგმობასთან დაკავშირებით. მოუწოდა თურქეთს, აღიაროს თავისი ისტორია. მოუწოდა წევრ სახელმწიფოებს საკუთარ პარლამენტებშიც მსგავსი რეზოლუცია სომეხთა გენოციდის დაგმობის შესახებ გაატაროს. ჩვენ როგორც საქართველოს მოქალაქეები, ქვეყნის, რომელიც მიისწრაფის ევროპისკენ, მოველით, რომ ჩვენი ხელისუფლება აღიარებს სომეხთა გენოციდს. შეუერთდება ევროპულ არჩევანს ამ საკითხში, დაგმობს სომეხთა გენოციდს და მხარში დაუდგება სომეხ ერს“, - განაცხადა ოჰანიანმა.

მისივე თქმით, თურქეთის ხელისუფლება აგრძელებს სომხების მიმართ ანტისომხურ და ქსენოფობიურ განცხადებებს. „1915-23 წლებში ჯერ ოსმალეთის იმპერიაში და შემდეგ თურქეთის რესპუბლიკაში მოხდა უსაშინლესი დანაშაული კაცობრიობის წინაშე. ერი, რომელიც ათასწლეულების განმავლობაში საკუთარ სამშობლოში ცხოვრობდა ასობით წლების განმავლობაში, თურქეთის მიერ განადგურდა და განიდევნა საკუთარი სამშობლოდან. მილიონნახევარ ადამიანზე მეტი შეეწირა თურქეთის პოლიტიკას იმ პერიოდში. თურქეთი დღესდღეობითაც აგრძელებს გენოციდურ პოლიტიკას სომეხი ერის წინააღმდეგ“, - განაცხადა ოჰანიანმა.