ზუგდიდის მუნიციპალიტეტის სოფელ კორცხელში საკრებულოს შუალედურ არჩევნებში მონაწილე კანდიდატი „ქართული ოცნებიდან“ ამირან ლაგვილავა სამართალდამცავ ორგანოებს მიმართავს და „ნაციონალურ მოძრაობას“ მისი თანხმობისა და ნებართვის გარეშე პარტიაში გაწვრიანებაში ადანაშაულებს.

„მივმართავ სამართალდამცავ ორგანოებს, დროულად გამოიძიონ თუ რატომ მოხდა ჩემს დაუკითხავად, „ნაციონალური მოძრაობის“ მხრიდან ჩემი გაწევრიანება პარტიაში.

მე ამირან ლაგვილავას, არ მიმიმართავს „ნაციონალური მოძრაობისთვის“ წერილობით ან ზეპირად პარტიაში გაწევრიანების თაობაზე. დაირღვა ჩემი უფლებები, მოხდა ჩემი გაწევრიანება ჩემს დაუკითხავად.

ამავდროულად ჩემი თანხმობის გარეშე გამოყენებულ იქნა ჩემი პირადი მონაცემები (პირადი ნომერი). მივმართავ სამართალდამცავ ორგანოებს, რომ გამოიძიონ ეს საქმე და დაისაჯონ ის პირები, ვინც ეს დანაშაული ჩაიდინა. ჩემს მსგავსად ამ პრობლემის წინაშე შეიძლება იყოს ნებისმიერი ადამიანი, როგორც ვხედავთ ნაციონალური მოძრაობა წევრების სიმრავლის გამო მოქალაქეებს დაუკითხავად აწევრიანებდა პარტიაში,“ - აცხადებს ამირან ლაგვილავა.

შეგახსენებთ, რომ „დაიცავი საქართველოს“ ერთ-ერთი ლიდერის კახა მიქაიას ინფორმაციით, ამირან ლაგვილავა დღემდე „ნაციონალური მოძრაობის წევრია. ოპოზიციური პარტიაში აღიშნულ ინფორმაციას ადასტურებენ და ამბობენ, რომ მას პარტიიდან გასვლის თაობაზე განცხადება არ დაუწერია.

ამირან ლაგვილავა კანდიდატად სოფელ კორცხელში რამდენიმე დღის წინ კახი კალაძემ წარადგინა.