სახელმწიფოს კუთვნილი თანხების გაფლანგვის ბრალდებით დაკავებულ ბაღდათის გამგებელს ბრალს სავარაუდოდ დღეს წაუყენებენ.

დაკავებულის ადვოკატის კახა წერეთლის განცხადებით, ბრალდებული ირაკლი გეგეშიძე ამჟამად დუმილის უფლებას იყენებს და შესაბამისად, გამოძიებას ის ჯერ არ დაუკითხავს. როგორც ადვოკატი აღნიშნავს, მისი დაცვის ქვეშ მყოფი ბრალს არ აღიარებს.

კახა წერეთლის თქმით, ირაკლი გეგეშიძისთვის ცნობილია ჩატარებული ტენდერის შესახებ, რომელშიც ის, როგორც გამგებელი მონაწილეობდა, თუმცა ბრალდებას, რომ თანხები გაფლანგა, არ აღიარებს.

„ამ ეტაპზე ბრალი ჯერ არ წაყენებია და საქმის მასალები არ გადმოგვცემია. ვიცი ჩემი დაცვის ქვეშ მყოფის პოზიცია - ის თავს დამნაშავედ არ სცნობს. თუ საჭირო იქნება, ჩვენ მივმართავთ ექსპერტიზას, ყველა კანონიერ საშუალებას, რათა დავამტკიცოთ, რომ ყველა თანხა მიზნობრივად იყო გახარჯული“, - განაცხადა კახა წერეთელმა.

სუს-ის ანტიკორუფციულმა სააგენტომ ბაღდათის გამგებელი, ირაკლი გეგეშიძე სამსახურებრივი უფლებამოსილების ბოროტად გამოყენებისა და სამსახურებრივი მდგომარეობის გამოყენებით დიდი ოდენობით თანხების გაფლანგვის ფაქტზე დააკავეს. გამოძიება მას 227 654,80 ლარის საბიუჯეტო თანხების გაფლანგვას ედავება. საქმე 2015 წლის 26 თებერვალს გამოცხადებულ გამარტივებულ ელექტრონულ ტენდერს ეხება, რომელიც სსიპ ,,თვითმმართველი ერთეული ბაღდათის მუნიციპალიტეტმა" ბაღდათი - ზეგანი - საკრაულას დამაკავშირებელი გზის რეაბილიტაციის მიზნით გამოაცხადა.