"გურჯაანის გამგეობის შენობაში მომხდარი ინცინდენტის შესახებ შესაბამისი სამსახურები დღეს დადებენ დასკვნას, დღესვე გაიგებს საზოგადოება რა მოხდა სინამდვილეში" - აღნიშნული განცხადება guardian.ge-სთან საუბრისას გურჯაანის მუნიციპალიტეტის გამგებელმა, გივი გერგიძემ გააკეთა.

გამგეობის შენობაში მომხდარ ფაქტთან დაკავშირებით, კახეთის გუბერნატორმა, ირაკლი შიოლაშვილმა განაცხადა, რომ მოხდება ინციდენტის მოკვლევა და შესაბამისი სამსახურის წარმომადგენლის სამსახურებრივი პასუხისმგებლობის საკითხი დადგება.

გურჯაანის მუნიციპალიტეტის შენობაში სოციალური სამსახურის სპეციალისტსა და 46 წლის ეკატერინე პეტრიაშვილს შორის სიტყვიერი დაპირისპირება მოხდა.

როგორც ცნობილია, სოციალურად დაუცველი მარტოხელა ქალბატონი გამგეობაში, მედიკამენტების შესაძენად აუცილებელი თანხის გამოყოფის სათხოვნელად, გურჯაანის გამგეობის სოციალური სამსახურის სპეციალისტთან იყო მისული. როგორც პეტრიაშვილის ოჯახის წევრები აცხადებენ, ქალბატონს ერთჯერადი სახით გამოყოფილი 100 ლარი ღვიძლის სამკურნალოდ სჭირდებოდა, თუმცა, მათივე თქმით, სოციალური სამსახურის თანამშრომელი მას მხოლოდ 70 ლარს სთავაზობდა, რამაც დაპირისპირება გამოიწვია. კონფლიქტის შემდეგ, ქალბატონმა, სავარაუდოდ, ინფარქტი მიიღო და გურჯაანის საავადმყოფოში გარდაიცვალა.

ინციდენტის თვითმხილველები ყვებიან, საჯარო მოხელის მხრიდან ადგილი ჰქონდა ხმამაღალ საუბარს და შეურაცხმყოფელ მიმართვებს. ოჯახი ჯანჯიბუხაშვილის სამსახურიდან გათავისუფლებას მოითხოვს. რა გახდა ველისციხეში მცხოვრები 46 წლის ქალის გარდაცვალების ზუსტი მიზეზი ჯერჯერობით უცნობია.