მე მიხარია, რომ მოსახლეობა ერთიანდება ჩვენს ფონდში და ჩვენ გვაქვს დიდი გეგმები გამოვასწოროთ მათი ცხოვრება და ჩვენ ამას აუცილებლად შევძლებთ, - აღნიშნული განცხადება „საქართველოს განვითარების ფონდის“ დამფუძნებელმა პაატა ბურჭულაძემ გარდაბანში, მოსახლეობასთან შეხვედრის დროს გააკეთა.

ბურჭულაძემ გარდაბანში „საქართველოს განვითარების ფონდის“ ოფისი გარდაბნის რაიონული ორგანიზაციის თავმჯდომარესთან, ზაზა ონიანთან და ფონდის შიდა პოლიტიკის თემატური ჯგუფის ხელმძღვანელთან ხათუნა ლაგაზიძესთან ერთად გახსნა. ფონდის დამფუძნებელმა და ორგანიზაციის წევრებმა ადგილობრივებთან შეხვედრებიც გამართეს. მათ კულტურის ცენტრში შეკრებილ მოსახლეობას ფონდის მიზნები და გეგმები გააცნეს. ორგანიზაციის დამფუძნებელმა ადგილობრივების პრობლემებიც მოისმინა და საზოგადოებას ამ პრობლემების მოგვარებისთვის ერთობლივი მუშაობა შესთავაზა.

„მომავლის იმედი არ აქვს ხალხს, ძალიან დიდი პრობლემებია. მე მიხარია, რომ მოსახლეობა ერთიანდება ჩვენს ფონდში და ჩვენ გვაქვს დიდი გეგმები გამოვასწოროთ მათი ცხოვრება და ჩვენ ამას აუცილებლად შევძლებთ, რადგანაც ხალხი მონდომებულია დაუდგეს „საქართველოს განვითარების ფონდს“, - განაცხადა პაატა ბურჭულაძემ გარდაბანში.