"ჩვენი ხალხის, ჩვენი ქვეყნის ნიჭიერების მჯერა და მჯერა, რომ ჩვენი სახელმწიფო ერთ დღეს ძალიან გამართული იქნება" - განაცხადა საქართველოს პრემიერ-მინისტრმა, ირაკლი ღარიბაშვილმა განათლების საერთაშორისო ცენტრის მიერ დაფინანსებულ სტუდენტებთან შეხვედრისას.
 

როგორც პრემიერმა შეხვედრაზე აღნიშნა, სახელმწიფოს პრიორიტეტია -ახალგაზრდებს მისცეს საშუალება, ცოდნა საზღვარგარეთ იმ პირობით გაიღრმავონ, რომ ისინი სამშობლოში აუცილებლად დაბრუნდებიან და მიღებულ ცოდნას საკუთარ ქვეყანას მოახმარენ.

"ეს არის ჩვენი მთავარი ამოცანა, რისკენაც ყველანი ერთად მივდივართ. ვალდებულნი ვართ, რომ ჩვენ ქვეყანას ვემსახუროთ. სამწუხაროდ, ყველა ადამიანს არ ეძლევა იმის საშუალება, რომ საკუთარ ქვეყანას ემსახუროს. ჩვენ თქვენ ამის საშუალებას გაძლევთ. ჩვენი ქვეყნის მომავალი ჩვენს ხელშია. მე, როგორც პრემიერი, მაქსიმალურ მხარდაჭერას გიცხადებთ" - აღნიშნა პრემიერმა სტუდენტებთან შეხვედრაზე.

მისივე თქმით, სახელმწიფო გამარჯვებულ სტუდენტებთან ხელშეკრულებას გააფორმებს, რომ ისინი საქართველოში დაბრუნების შემდეგ, გარკვეული პერიოდის განმავლობაში, საჯარო სამსახურში იმუშავებენ.

"ჩვენ გაძლევთ პირობას, რომ თქვენს შესაფერის სამსახურს დაგახვედრებთ სამშობლოში დაბრუნებისთანავე. ვიცი, რომ საუბარია 3-დან 5 წლამდე, მაგრამ ამის შემდეგ, თუ თქვენ გექნებათ სურვილი, რომ მუშაობა ისევ საჯარო სექტორში განაგრძოთ, ამის სრული თავისუფლება გექნებათ. მიმაჩნია, რომ ახლაა შესაძლებლობა, სამშობლოსთვის კონსოლიდაცია მოვახდინოთ. ჩვენი ხალხის, ჩვენი ქვეყნის ნიჭიერების მჯერა და მჯერა, რომ ჩვენი სახელმწიფო ერთ დღეს ძალიან გამართული იქნება" - აღნიშნა პრემიერ-მინისტრმა.

განათლების საერთაშორისო ცენტრის კონკურსში სამაგისტრო და სადოქტორო პროგრამებზე დაფინანსების მოპოვების მსურველთა შორის გამარჯვებულები გამოვლინდნენ. ცენტრის დაფინანსება 78-მა სტუდენტმა მოპოვა. გამარჯვებულთა შორის 49 მაგისტრანტი და 13 დოქტორანტია. დაფინანსება მოიპოვა შარშან გაცემული მიმდინარე გრანტის მფლობელმა 16 სტუდენტმაც.