აბაშის მუნიციპალიტეტში 2016 წელს ძირითად  პრიორიტეტულ მიმართულებებს ინფრასტრუქტურული (3 მილიონ 591,1 ათასი) და სოციალური (501,7 ათასი) პროგრამები წარმოადგენს, ამის შესახებ guardian.ge-ს აბაშის მუნიციპალიტეტის გამგებელმა მამუკა კვიტაშვილმა განუცხადა. როგორც მან აღნიშნა, აბაშის მუნიციპალიტეტის 2016 წლის ადგილობრივი ბიუჯეტი 9 485,9 ათასი ლარია და იგი წინა წელთან შედარებთ 23 %-ითაა გაზრდილი.


გამგებლის თქმით, აბაშაში წელსაც 15 სოციალური პროგრამა ხორციელდება, რომელთა შორის ყველაზე მნიშვნელოვანია მოსახლეობის სამედიცინო მომსახურების პროგრამა. კვიტაშვილი ამბობს, რომ ამ მხრივ 2015 წელს ათვისებულია 224,020 ლარი; მრავალშვილიანი ოჯახების დახმარებაზე დაიხარჯა 100 000  ლარი, ომის ვეტერანებზე გაცემულია 24 900 ლარი,   მესამე და მეტი ახალშობილთა ოჯახებმა 11 400 ლარი, ხოლო შეზღუდული შესაძლებლობის მქონე ბავშვებმა 7 800 ლარი მიიღეს.


გამგებელი აცხადებს, რომ მიმდინარე წელს არაერთი პროექტი განხორციელდება „სოფლის მხარდაჭერის პროგრამის“ ფარგლებში, რისთვისაც აბაშის მუნიციპალიტეტისათვის 554.5 ათასი ლარია გამოყოფილი.  ამ პროგრამის ფარგლებში პროექტების  მთავარი მიმართულებებია:


• საბავშვო ბაღების შენობის  აშენება და შეკეთება

• წყალსაწრეტი არხებისა და მილხიდების რეაბილიტაცია  

•  სასოფლო-სამეურნეო სავარგულებთან დამაკავშირებელი ხიდების და მიმდებარე ტერიტორიის კეთილმოწყობის სამუშაოები

• სოფლის გზების ორმული შეკეთება და მოხრეშვა

• სპორტული ობიექტების კეთილმოწყობა  

• გარე განათების მოწყობა  

• საძოვრის შემოღობვის სამუშოები

• სოფლის კლუბების შენობის შეკეთება
 
• სოფლებში ჭაბურღილების მოწყობის სამუშაოები  და ა.შ.


რაც შეეხება 2016 წლის მსხვილ ინფრასტრუქტურულ პროექტებს, გამგებლის ინფორმაციით, აბაშის მუნიციპალიტეტში ილიას ქუჩიდან სოფ. ეწერის მიმართულებით და სოფ. ნორიოს ცენტრიდან სოფ. საგვაზაოს მიმართულებით გზის ასფალტ-ბეტონით მოწყობის პროექტისათვის უკვე ჩატარდა ტენდერი და მისი ღირებულება - 877 727 ლარია. ასევე დადებულია ხელშეკრულება მარანი-პირველი მაისი-გაუწყინარის გზის მოწყობისა ( 717 049 ლარი) და ცენტრალური მაგისტრალიდან სოფ. ქოლობნის მიმართულებით არსებული გზის ასფალტ-ბეტონის საფარით მოწყობის პროექტებზე  (400 000 ლარი).


მამუკა კვიტაშვილის განცხადებით, მალე ჩატარდება ტენდერები სოფ. მაცხოვრისკარისა და  სოფ. გეზათში საბავშვო ბაღების მშენებლობის, ქ. აბაშაში ტროტუარების შეკეთების,  ნორიოს თემის სოფ. განკარის ცენტრიდან სოფ. ძვ. აბაშის მიმართულებით არსებული გზის მოწყობის, დ. აღმაშენებლის ქუჩის II ჩიხის მოასფალტებისა და სხვა პროექტების განხორციელებისათვის.


აბაშის გამგებლის ცნობით, მთავრობის პროგრამის - „აწარმოე საქართველოში“ ფარგლებში 11 მიკრო და მცირე მეწარმე დაფინანსდა  5, 10 და 15 ათასი ლარით; მაგალითად:  შპ.ს. „თორნიკე“, შპ.ს. „სიხიტი“, ი.მ. „ნიკოლოზ სურგულაძე„ და ა.შ.


„დაინტერესება ძირითადად არის სოფლის მეურნეობის  მიმართულებით. მიმდინარეობს მუშაობა ინვესტორებთან და  იმედია კონკრეტული წინადადებები მალე გამოიკვეთება,“ განუცხადა guardian.ge-ს მამუკა კვიტაშვილმა და შეკითხვაზე - რამდენად შეძლო საარჩევნო პროგრამის განხორციელება და როგორ შეაფასებდა ამ პოსტზე განვლილ პერიოდს - ასე უპასუხა:


„ჩემი არჩევის დღიდან, საარჩევნო პროგრამის ფარგლებში მუნიციპალიტეტის მოსახლეობისთვის მიცემული პირობების  შესრულება ძირითადად განხორციელდა, მაგრამ   ბევრი გეგმა და პროექტია, რომლის  სისრულეში მოყვანასაც მომავალში ვაპირებ.“