ჩვენ ვთვლით, რომ მსოფლმხედველობისა და ზოგადად, საგარეო პოლიტიკის თვალსაზრისით, თანამედროვე დასავლური ქვეყანა ვართ, - აღნიშნული განცხადება საქართველოს პრემიერ-მინისტრმა გიორგი კვირიკაშვილმა ამერიკაში, ილინოისის უნივერსიტეტში სიტყვით გამოსვლისას გააკეთა. მან აღნიშნა, რომ ბოლო ხუთი წლის განმავლობაში ქვეყანამ მოიზიდა მილიარდობით დოლარის პირდაპირი უცხოური ინვესტიციები, ხოლო უმუშევრობის დონე დაეცა.


როგორც პრემიერმა სტუდენტებთან შეხვედრისას აღნიშნა, მაისში საქართველო დამოუკიდებლობის აღდგენის 25-ე წლისთავს ზეიმობს და მოკლე დროში საქართველო სამოქალაქო ომის ცეცხლში გახვეული ქვეყნიდან გარდაიქმნა თანამედროვე, დემოკრატიულ და დინამიკურ სახელმწიფოდ, თუმცა გასაკეთებელი კიდევ ბევრია.


კვირიკაშვილის განცხადებით, დღევანდელი საქართველო სრულიად განსხვავდება იმისგან, რასაც ის 20 წლის წინ წარმოადგენდა.


”ყველა სფეროში მიღწეულია სერიოზული პროგრესი, დაწყებული ჯანდაცვითა და განათლებით და დამთავრებული ეკონომიკით, დემოკრატიით, კანონის უზენაესობითა და ადამიანის უფლებათა დაცვით. შევეცდები, ლაკონური ინფორმაცია მოგაწოდოთ საქართველოს შესახებ: ჩვენ ვართ პატარა (მოსახლეობა: 4 მილიონი), მაგრამ სტრატეგიულად განლაგებული ქვეყანა; ჩვენ ვართ დემოკრატიული ქვეყანა; ჩვენ გვაქვს თავისუფალი, ღია და გამჭვირვალე ბიზნესგარემოს რწმენა; მსოფლიო ბანკის მიხედვით, ჩვენი ქვეყანა ერთ-ერთი წამყვანია მსოფლიოში ბიზნესის წარმოების სიმარტივის კუთხით; მსოფლიო ეკონომიკური ფორუმის მიხედვით, გადასახადების სიმსუბუქის კუთხით ჩვენ მე-9 ადგილზე ვართ მსოფლიოში. მოგახსენებთ რამდენიმე მაგალითს: კომპანიების მოგების გადასახადი შეადგენს 15 პროცენტს, ფიზიკური პირის საშემოსავლო გადასახადი 20 პროცენტს, დღგ 18 პროცენტს, ამასთან გადასახადები არ იზრდება. გარდა ამისა, ჩვენი რეფორმების ახალი დღის წესრიგის თანახმად, 2017 წლის 1 იანვრიდან მოგების გადასახადი გაუქმდება და დაიბეგრება მხოლოდ დივიდენდები; ჩვენ აღმოვფხვერით კორუფცია; ბოლო ხუთი წლის განმავლობაში ჩვენ მოვიზიდეთ მილიარდობით დოლარის პირდაპირი უცხოური ინვესტიციები, ხოლო უმუშევრობის დონე დაეცა; 2014 წელს საქართველოში პირდაპირმა უცხოურმა ინვესტიციებმა შეადგინა 1,75 მილიარდი აშშ დოლარი, რაც ყველაზე მაღალი მაჩვენებელია 2008 წლის შემდეგ. 2015 წელს პირდაპირი უცხოური ინვესტიციების ოდენობამ შეადგინა 1,4 მილიარდი დოლარი, რაც ერთ-ერთი ყველაზე მაღალი მაჩვენებელია ბოლო ხუთი წლის განმავლობაში; ჩვენ გვაქვს საყოველთაო ჯანდაცვის პროგრამა და ძლიერი განათლების სისტემა, რაც ნიშნავს იმას, რომ ჩვენ ვამზადებთ ჯანმრთელ და განათლებულ კადრებს”, - განაცხადა გიორგი კვირიკაშვილმა.


მისივე თქმით, საქართველოს აქვს მჭიდრო და აქტიური ურთიერთობები ევროკავშირსა და ნატო-სთან და ჩვენი ქვეყანა მტკიცედ დგას ახლო მომავალში ამ ორგანიზაციებში გაწევრების გზაზე.


ილინოისის უნივერსიტეტში გიორგი კვირიკაშვილის გამოსვლის თარგმანს საქართველოს მთავრობის ადმინისტრაცია ავრცელებს.