2016 წელს ცაგერის მუნიციპალიტეტში განსახორციელებელ მსხვილ ინფრასტრუქტურულ პროექტებს შორის ყველაზე მაღალბიუჯეტიანი ქ.ცაგერის სპორტული დარბაზის მშენებლობა გახლავთ, რომლის ღირებულებაც 2,8 მილიონ ლარს შეადგენს, - განუცხადა guardian.ge -ს ცაგერის მუნიციპალიტეტის გამგებელმა რევაზ ბენიძემ.  


მისი თქმით, გარდა აღნიშნული პროექტისა, დაგეგმილია სოფელ ქვედა ცაგერში ახალი საბავშვო ბაგა-ბაღის მშენებლობა, სოფელ ალპანაში ხელოვნურსაფარიანი სპორტული მოედნის მოწყობა, ცაგერის მუნიციპალიტეტში მდინარე ლაჯანურზე ტიბიშურის ტერიტორიაზე გასასვლელი ხიდის მშენებლობა. გამგებლის ინფორმაციით, 2016 წელს გამოცხადებულ ინფრასტრუქტურულ პროექტებზე ტენდერების ჩავარდნას ადგილი არ ჰქონია, შესაბამისად თითოეულ ობიექტზე მიმდინარეობს სამუშაოები.


რევაზ ბენიძის განცხადებით, მსხვილი პროექტების პარალელურად, ცაგერის მუნიციპალიტეტში „სოფლის მხარდაჭერის პროგრამის“ ფარგლებში 420 434 ლარის ღირებულების პროექტები განხორციელდება.


გამგებლის ინფორმაციით, აღნიშნული თანხით 95 პროექტი განხორციელდება, მათ შორის წყალსადენის რეაბილიტაცია (34, 466 ლარი), გარე განათების სამუშაოები (69, 894 ლარი), გზის და ხიდების აღდგენის სამუშაოები (21, 076 ლარი), წყალსადენის მილების შეძენა (6 000 ლარი), სასაფლაოს შემოღობვა (18 000 ლარი), სპორტული დარბაზების მოწყობა-აღჭურვა (71 600 ლარი), მოტობლოკების შესყიდვა (30 066 ლარი), სანიაღვრე არხების მოწყობის სამუშაოები (25 566 ლარი).


ცაგერის გამგებელი აღნიშნავს, რომ ადგილობრივი წარმოების განვითარების მხრივ მუნიციპალიტეტს დაბალი მაჩვენებელი გააჩნია. მისი თქმით, მუნიციპალიტეტში ძირითადად იწარმოება სოფლის მეურნეობის პროდუქტები; ყურძენი, თესლოვანი და კურკოვანი ხილი, ხორცი, თაფლი, თევზი. რაც შეეხება მრეწველობის დარგებს, მცირე რაოდენობით იწარმოება მინერალური წყლები და სხვადასხვა სახის სამშენებლო მასალები - ინერტული მასალები, სამშენებლო ბლოკი და მოსაპირკეთებელი ქვა: სპონტიო, საირმის ქვა.


როგორც რევაზ ბენიძემ guardian.ge -ს განუცხადა, დაინტერესება ძირითადად გამოიხატება მევენახეობის, მეფუტკრეობის, სათევზე-საკალმახე მეურნეობების მოწყობის მიმართულებით და მდინარეების: ჯონოულის, ცხენისწყლის, ლაჯანურის და რიონის ხეობებში ჰესების მშენებლობის კუთხით. სოფელ ოყურეშში შემოსულია ორი კერძო ინვესტორი, რომელთაგან ერთი უსახელაურის ვენახის გაშენებითაა დაინტერესებული, მეორე კი  რაჩხაჰესის მშენებლობით.


ცაგერის გამგებელი ამბობს, რომ გასულ წელს დაიწყო სასოფლო-სამეურნეო კოოპერატივების შექმნა და სადღეისოდ მოქმედ 21 კოოპერატივში გაერთიანებულია 80-ზე მეტი მცირე ფერმერი, ხოლო რეგისტრაციის პროცესშია 8 კოოპერატივი. მათი საქმიანობის ძირითად სფეროს წარმოადგენს სოფლის მეურნეობის ისეთი დარგები, როგორიცაა რძის გადამამუშავებელი წარმოება, ღვინის ჩამოსასხმელი საამქროების მშენებლობა, თაფლისა და ხორცის წარმოების განვითარება.


რევაზ ბენიძის განცხადებით, ცაგერის მუნიციპალიტეტის 2016 წლის ბიუჯეტის შემოსავლების გეგმა 4 მილიონ 871,0 ათასი ლარით განისაზღვრა, რაც 288,2 ათასი ლარით აღემატება გასული წლის ანალოგიურ მაჩვენებელს. დღევანდელი მდგომარეობით დამტკიცებულ ბიუჯეტში შეტანილი ცვლილებების გათვალისწინებით კი, 2016 წლის ბიუჯეტი შეადგენს 7 მილიონ 509, 9 ათას ლარს, რაც გამგებლის თქმით, გამოწვეულია ნაშთის ცვლილებით, 2016 წელს საქართველოს რეგიონებში განხორციელებული პროექტების ფონდიდან მიღებული თანხებით და სოფლის დახმარების პროგრამისთვის გამოყოფილი სახსრებით.