სართველოს პრეზიდენტი უზენაესი სასამართლოს მოსამართლეობის კანდიდატებთან დაკავშირებით დამატებითი კონსულტაციების გამართვაზე უარს აცხადებს - აღნიშნული განცხადება ჟურნალისტებთან საუბარისას პრეზიდენტის მრჩეველმა ადამიანის უფლებათა საკითხებში, კახა კოჟორიძემ გააკეთა.

კოჟორიძის თქმით, მისთვის გაუგებარია უმრავლესობის წევრების განცხადება - საქართველოს პრეზიდენტი უზენაესი სასამართლოს კანდიდატებით არ ვაჭრობს.

„ჩემთვის გაუგებარია განცხადება სამი მიზეზის გამო. პირველი - რადგან კანდიდატები უკვე დასახელებულია, მეორე - ამ კანდიდატების საკომიტეტო განხილვები უკვე დასრულებულია და მესამე - პრეზიდენტის პრინციპული პოზიციაა, რომ პოლიტიკური კონსულტაციები და კულუარული შეთანხმებები უზენაესი სასამართლოს კანდიდატებთან დაკავშირებით არ გაიმართოს. ანდიდატების შერჩევა პოლიტიკური კონსულტაციების და შეთანხმებების საგანი არ უნდა გახდეს”, - განაცხადა კოჟორიძემ.

კითხვაზე, რას მოიმოქმედებს პრეზიდენტის ადმინისტრაცია, თუკი ქვეყნის პირველი პირის მიერ შეთავაზებულ კანდიდატებს პარლამენტი ჩააგდებს, პრეზიდენტის მრჩევლის თქმით, წინასწარ ამის პროგნოზირება არ შეუძლია.

„ყოფილა შემთხვევები, როცა პარლამენტმა ესა თუ ის კანდიდატურა ჩააგდო, თუმცა შემდეგ იგივე კანდიდატურას მხარი დაუჭირა, ჩემთვის სრულიად გაუგებარია მსგავსი რამ. გაუგებარია ხოლმე პარლამენტის მოტივაცია“, - აღნიშნა კოჟორიძემ.

უზენაესი სასამართლოს მოსამართლეებად პრეზიდენტის მიერ წარდგენილი კანდიდატებისადმი მხარდაჭერის საკითხი პარლამენტში ღია საკითხთად რჩება.