პრემიერ-მინისტრი ირაკლი ღარიბაშვილი მიიჩნევს, რომ ევროპასთან ვიზის ლიბერალიზაციის პროცესის დასრულების შემდეგ, ქართული პასპორტები უფრო მიმზიდველი გახდება, მათ შორის, აფხაზებისა და ოსებისთვის.

ამის შესახებ მან კონფერენცია "საქართველოს ევროპული გზის" გახსნისას განაცხადა და საქართველოს მიერ განხორციელებულ რეფორმებზე გაამახვილა ყურადღება.

მისი განმარტებით, ვიზის ლიბერალიზაციის პროცესი საქართველოს მოსახლეობისთვის ხანგრძლივი პერსპექტივა არ არის.

"მნიშვნელოვანია, რომ ჩვენი პასპორტები უფრო მიმზიდველი გახდება სხვადასხვა ხალხისთვის, მათ შორის, ჩვენი დებისა და ძმების - აფხაზებისა და ოსებისთვის. ევროპასთან თავისუფალი ვაჭრობის ხელშეკრულებასაც მოვაწერეთ ხელი და თავისთავად, ეს ახალ პერსპექტივებს ხსნის. საჭიროა, კანონში ცვლილებების შეტანა იმისთვის, რომ გავზარდოთ სტანდარტები და მივუახლოვდეთ საერთაშორისო სტანდარტებს" - განაცხადა ღარიბაშვილმა.

მისივე თქმით, განსაკუთრებული ყურადღება უნდა გამახვილდეს სურსათის უსაფრთხოებისა და ანტიმონოპოლიურ კანონმდებლობებზე.

პრემიერის განცხადებით, ის, რასაც ამ ეტაპზე საქართველომ მიაღწია, დიდი და ტრანსფორმაციის გზის მხოლოდ დასაწყისია.

"თავისთავად, ეს ყველაფერი გულისხმობს ძალიან ბევრი რეფორმის გატარებას. აუცილებელია განსაკუთრებული ყურადღება მიექცეს კერძო სექტორის განვითარებას. უნდა განხორციელდეს რეფორმები, შეიქმნას ფონდები, რომ მოსახლეობისთვის სახსრები უფრო ხელმისაწვდომი გახდეს" - აცხადებს პრემიერი.

ღარიბაშვილი დარწმუნებულია, რომ ევროკავშირთან ასოცირების ხელშეკრულება ღრმა და ყოვლისმომცველი თავისუფალი სავაჭრო სივრცის ჩათვლით, ხელს შეუწყობს საქართველოს შემდგომ განვითარებას, გახსნის უფრო მსხვილ ბაზრებს და უფრო გამჭვირვალე და სტაბილურ ეკონომიკურ გარემოს შექმნის.

მისივე ვარაუდით, ქვეყანა უცხოური ინვესტიციებისთვის უფრო მიმზიდველი გახდება. ამავე დროს, საქართველო ყველაფერს გააკეთებს იმისთვის, რომ ეს ასე მოხდეს.

"ეს თუ ასე მოხდა, საქართველო იქნება მაგალითი რეგიონის ქვეყნებში, რომ მათაც მიეცეთ სტიმული რეფორმები განახორციელონ" - აღნიშნა პრემიერ-მინისტრმა.

კონფერენცია "საქართველოს ევროპული გზა" ბათუმში, სასტუმრო "შერატონ მეტეხი პალასში" მიმდინარეობს.