ახალი პოლიტიკური ცენტრი ”გირჩის” წევრი გოგა ხაჩიძე გიორგი ვაშაძის ”ნაციონალური მოძრაობიდან” წასვლას ეხმაურება და აცხადებს, რომ გიორგი ვაშაძემ გაიმეორა ის, რაც ერთი წლის წინათ "გირჩმა" განაცხადა.

”მე მიმაჩნია, რომ ქვეყნის პოლიტიკური კულტურისთვის არ იქნება კარგი ამბავი, თუ ”ნაციონალური მოძრაობა” გაქრება ზოგადად პოლიტიკიდან, თუმცა ის პრობლემა, რომელზეც ჩვენ ვლაპარაკობდით, როცა ჩვენ წამოვედით, რომ არ ხდება პარტიის განახლება, ეს პრობლემა რჩება და თავის შედეგებს კიდევ მოიტანს. ჯობია, ”ნაციონალურმა მოძრაობამ” მესიჯ-ბოქსი შეცვალოს. ყველაფერი იმიტომ ხდება, რომ ივანიშვილის ინტერესებს ემსახურება და ყველაფერი იმიტომ ხდება, რომ რაღაცას ემსახურება - ეს მესიჯი შესაცვლელია, ცოტა უფრო ლოგიკური განცხადებები უნდა გააკეთონ. თუ არ უნდათ, რომ ივანიშვილის ინტერესებს ემსახურონ, ნება იბოძონ, გახსნან პარტიის კარები და განაახლონ პარტია. თუ არადა ისხდნენ მაშინ და იყვნენ, გაგრძელება არ უნდათ? მე მინდა, რომ ”ნაციონალური მოძრაობის” ბოლოში to be continue მიეწეროს, მაგრამ არ აწერენ და... ჩვენ ამას ვითხოვდით მაშინ, როცა პარტიაში ვიყავით. პრაიმერიზის დროს მთელი წელი ვითხოვდით, რომ პარტია უნდა განახლებულიყო. ვანო მერაბიშვილის გამოსვლის მთავარი მესიჯი 19 აპრილს ის იყო, რომ პარტია განახლდება, მაგრამ არ ანახლებენ”, - აღნიშნა გოგა ხაჩიძემ.

გიორგი ვაშაძემ ”ერთიანი ნაციონალური მოძრაობა” დატოვა. ის ახალ პოლიტიკურ მოძრაობას ქმნის. ამის თაობაზე საგანგებო განცხადება ვაშაძემ ცოტა ხნის წინათ, პარლამენტში გააკეთა.