მანანა კობახიძე გიორგი ვაშაძის მიერ ”ნაციონალური მოძრაობის” დატოვების საკითხს ეხმიანება. კობახიძე აცხადებს, რომ „ნაციონალურ მოძრაობაში“ დიდი ხანია განხეთქილებაა. კობახიძემ დღესვე აღნიშნა, რომ თავის დროზე „ნაციონალურ მოძრაობას“ პარტიის გენერალური მდივანი ზურაბ ჯაფარიძეც გაემიჯნა.

”დიდი ხანია ამ პარტიაში არის განხეთქილება. თავის დროზე ეს პარტია გენერალურმა მდივანმა დატოვა. ზურაბ ჯაფარიძე გენერალური მდივანი იყო, მათ გაემიჯდა და შექმნა თავისი პარტია. ეს ბევრ რამეზე მეტყველებს. პარტიის თავმჯდომარე უცხო ქვეყნის მოქალაქეა. მან დატოვა სამშობლოც, პარტიაც, ყველა და ყველაფერი. კარგია, რომ ეს ქვეყანა დატოვა. შიგნით პარტიაში რა არეულობა აქვთ ნაკლებად მაინტერესებს, თუმცა ერთი რამ ცხადია, რომ წინასაარჩევნოდ ალბათ იქ არის დავა სიაში ადგილებზე, მაჟორიტარ კანდიდატებზე. მთელი რიგი თემებია თანამდებობების გადანაწილების, თუნდაც ოპოზიციაში ყოფნის პირობებში, რაშიც ალბათ ვერ თანხმდებიან და ეს არის მიზეზი”, - აღნიშნა მანანა კობახიძემ.

გიორგი ვაშაძემ ”ერთიანი ნაციონალური მოძრაობა” დატოვა. ის ახალ პოლიტიკურ მოძრაობას ქმნის. როგორც ვაშაძემ განაცხადა, ”ნაციონალური მოძრაობისგან” ამომრჩეველი ელოდა ახალ ინიციატივებს, რაც არ განხორციელდა და პარტია დახურულ, კაბინეტურ სისტემად ჩამოყალიბდა.
გიორგი ვაშაძის განცხადებით, “ნაციონალური მოძრაობის“ დახურული კაბინეტური სისტემა, მისი ბუნებიდან გამომდინარე ივანიშვილის მავნებლური მმართველობის მოკავშირეა და პარტიის ერთი მცირე ჯგუფის პერსონალურ ინტერესებს ემსახურება.

როგორც ვაშაძემ აღნიშნა, “ამ კაბინეტურ მმართველობას აქვს თავისი სახელები და გვარები: - გიგა ბოკერია, მიშა მაჭავარიანი, ხათუნა გოგორიშვილი, გოკა გაბაშვილი და მათ ფასადად ქცეული დავით ბაქრაძე“.