საარჩევნო კოდექსში ე.წ გერმანული მოდელის დანერგვასთან დაკავშირებით, შესაძლოა, მომავალ კვირას პარლამენტში ახალი ინიციატივა შევიდეს.

„ნაციონალური მოძრაობის“ წევრმა, ლევან თარხნიშვილმა არ გამორიცხა, რომ ფრაქცია რომელიც აღნიშნული საკითხის ინიცირებას მოახდენს, სწორედ „ნაციონალური მოძრაობა“ იყოს. 

თავის მხრივ, „ახალი მემარჯვენეების“ ლიდერმა მამუკა კაციტაძემ განაცხადა, რომ საარჩევნო სისტემასთან დაკავშირებით არასაპარლამენტო ოპოზიციას უკვე აქვს წარმოდგენილი გერმანული მოდელი, როგორც სარეზერვო ვარიანტი, თუკი საკონსტიტუციო ცვლილება ჩავარდება ან მისი მიღება დროში გაიწელება.

„თუ საკონსტიტუციო ცვლილების მიღება დროში გაიწელება, ჩვენ გავხდებით მოწმე ახალი ინიციატივისა, რომ საარჩევნო კოდექსში შევიდეს ცვლილება ე.წ. გერმანული მოდელის დანერგვის ვარიანტის დასამკვიდრებლად. თუმცა, არის კონსულტაციები დაწყებული, პირადად მე მაქვს საპარლამენტო ფრაქციების დიდი მხარდაჭერის იმედი და მომავალი კვირიდან შესაძლოა ახალი ინიციატივის მომსწრეც გავხდეთ პარლამენტში“, - განაცხადა მამუკა კაციტაძემ.

პრეზიდენტის ადმინისტრაციაში გიორგი მარგველაშვილის მრჩევლებსა და ოპოზიციური პოლიტიკური სპექტრის წარმომადგენლებს შორის დაახლოებით ორსაათიანი დახურული შეხვედრა გაიმართა. შეხვედრას არ ესწრებოდნენ ფრაქცია „ეროვნული ფორუმის“ წარმომადგენლები, თუმცა იქ იმყოფებოდნენ ფრაქცია ”ნაციონალური მოძრაობის” და ფრაქცია „თავისუფალი დემოკრატების“ წევრები.