დღეს ჩვენ ახალ ნაბიჯს ვდგამთ ევროპული საქართველოს შექმნის თვალსაზირისით, - განაცხადა საქართველოს პრეზიდენტმა, გიორგი მარგველაშვილმა რიყის პარკში, ევროპის დღეების გახსნაზე.  

"საქართველოში 2016 წელი ევროპული სახელმწიფოს წლად გამოვაცხადე, ეს გავაკეთეთ იმიტომ, რომ ამ წელს მოხდება ძალიან მნიშვნელოვანი ნაბიჯების გადადგმა ჩვენი ახალი სახელმწიფოებრიობის თვალსაზრისით. 25 წლის წინ ჩვენ ერთად ვიდექით იმისთვის, რომ შექმნილიყო დამოუკიდებელი ქართული სახელმწიფო, შექმნილიყო ბევრად უფრო რთულ ვითარებაში, საბჭოთა კავშირში.

დღეს ჩვენ უნდა გადავდგათ კიდევ ერთი მნიშვნელოვანი ნაბიჯი დამოუკიდებლობიდან თავისუფლებისკენ. თავისუფლებისკენ ნაბიჯის გადადგმა ნიშნავს არა მარტო იმას, რომ ვიღაცას გაემიჯნები, არამედ ეს ნიშნავს იმას, რომ შენ შექმნი შენსას, უნიკალურს, განსაკუთრებულს, თანამედროვეს, ისეთს, როგორც შენ გინდა, როგორც შენს წინაპრებს უნდოდათ, როგორც შენს შთამომავლობას ენდომება.

ამ თვალსაზრისით ჩვენ დღეს ახალ ნაბიჯს ვდგამთ ევროპული საქართველოს შექმნის თვალსაზრისით. მე ვხედავ ქვეყანას, ერს, რომელსაც აქვს ხედვა, რომელმაც იცის ხვალ და ზეგ რა უნდა გააკეთოს, ქვეყანას რომელიც თავის ტერიტორიებს გაამთლიანებს არა ომით, არამედ იმით, რომ განსაკუთრებულ ქვეყანას და განსაკუთრებულ თავისუფლებას შექმნის”, - განაცხადა გიორგი მარგველაშვილმა.