”ჩვენ ველოდებით საქართველოს მიერ ევროატლანტიკური ინტეგრაციის გზაზე მიღწეული პროგრესის აღიარებას" - განაცხადა საქართველოს პრემიერ-მინისტრმა, გიორგი კვირიკაშვილმა ლონდონში, ანალიტიკურ ცენტრ Chatham House-ში სიტყვით გამოსვლისას.

"მსურს ვუთხრა ნებისმიერს, ვინც საქართველოს საგარეო კურსთან დაკავშირებით სპეკულირებს - კიდევ ერთხელ ვადასტურებ, რომ ესაა საქართველოს მოქალაქეების ურყევი ნება, რაც რამდენჯერმე დადასტურდა გამოკითხვებისა და რეფერენდუმის მეშვეობით. საქართველოს მთავრობა საზოგადოების, ჩვენი ამომრჩევლების ნებას ასრულებს. საქართველოს მიზანია ევროკავშირის სტანდარტებთან დაახლოება, ხოლო საბოლოო ამოცანაა ევროკავშირში და თავისთავად, ნატო-ში გაწევრიანება. საქართველოს უსაფრთხოებისა და თავდაცვისუნარიანობის კუთხით ამ მიზნებს ალტერნატივა არ გააჩნია. განვითარება დამოკიდებულია რეგიონულ სტაბილურობასა და მშვიდობაზე. საქართველო მონაწილეობს ნატო-ს „მკიცე მხარდაჭერის მისიაში“ ავღანეთში. საქართველო ამ მისიის მეორე უდიდესი კონტრიბუტორი ქვეყანაა - ჩვენი ჯარისკაცების რაოდენობა ავღანეთში აღემატება 900-ს. ავღანეთის მისიაში მონაწილეობის შედეგად დაიღუპა 32 ქართველი ჯარისკაცი. მიმაჩნია, რომ ეს საკმაოდ დიდი მსხვერპლია ქვეყნისთვის, რომლის მოსახლეობა დაახლოებით 3,7 მილიონია. ჩვენ თანმიმდევრულები ვართ ავღანეთის, ცენტრალური აფრიკისა და მალის მისიებში მონაწილეობის თვალსაზრისით. ჩვენ გვაქვს შესანიშნავი თავსებადობა ნატო-ს ჯარებთან”, - განაცხადა პრემიერმა.

მისივე თქმით, 2 დღის წინ აშშ-ს, დიდი ბრიტანეთისა და საქართველოს ძალისხმევის შედეგად, ერთობლივი სამხედრო წვრთნების, „ღირსეული პარტნიორის” ახალი პროექტი დაიწყო, რომელიც კონცენტრირდება ქართველი სამხედროების ნატო-ს ჯარებთან თავსებადობისა და საექსპედიციო შესაძლებლობების უზრუნველყოფაზე.

”სამომავლოდ ვგეგმავთ, მეტი ყურადღება დავუთმოთ ქართული ჯარის მიერ მოწინააღმდეგის შეკავებისთვის საჭირო უნარ-ჩვევებთან დაკავშირებულ წვრთნებს. სწორედ ამიტომ ვგეგმავთ გაერთიანებულ სამეფოსა და აშშ-სთან ჩვენი თანამშრომლობის ორმხრივი ფორმატების კიდევ უფრო გაფართოებას. ეს საკითხი განვიხილეთ გაერთიანებული სამეფოს თავდაცვის მდივანთან გუშინდელი საუბრისას”, - განაცხადა პრემიერმა.